المساعد الشخصي الرقمي

مشاهدة النسخة كاملة : انا بسم الله ابدا واحمد الله واجزل الابيات


عنيزاوي
17-04-2015, 02:07 PM
آنا بسم الله أبدا واحمد الله واجزل الابيات
واعظم خالقي جل وعلا وأقول سبحانه

أحد فرد صمد منزل على سيد البشر لآيات
حمى البيت الحرام من ابرهه لا يهدم أركانه

يغيث المستغيث ومخرج (ن) الحي من لموات
كريم (ن) جل شانه فاتح (ن) للخلق بيبانه

خلق جن وخلق انس وخلق نار وخلق جنات
وخلق خلق (ن) كثير وفرق أصواته والوانه

رحيم بالعباد ويسمع اللي ينثر العبرات
دموعه فوق خده يرجي إحسانه وغفرانه

وكم يعطي وكم يشفي وكم فرج من الضيقات
وكم يهدي من اللي فالذنوب أغواه شيطانه

وكم يرحم وكم يغفر وكم يعفو عن السيات
وكم يعطف على العبد المنيب ويمسح أحزانه

وكم ينظر ويستر ويتجاوز خافي الزلات
وكم نجى غريق (ن) فالبحر والموت قد حانه

صلاتي له وصومي والدعاء والنذر والطاعات
والى الله نلجتي من نزغة الشيطان واعوانه

إلى الله تنصرف كل العباده في جهر وسكات
هو الحي السميع ومن لجا به عزه وعانه

إلهي لا إله إلا انت وانت المرتجى بالذات
ولا غيرك يضر ولا بينفع وان على شانه

تجلت قدرته رب الخلايق محصي الذرات
وبشر كل قلب (ن) ما يعرف الله بخسرانه

وعقبه بتّبع سنه نبيي سيد السادات
شفيع الناس يوم الناس حفيانه وعريانه

نطبق سنته ونحبها مانتبع الموضات
إلى عاد الضعيف يجامل أصحابه وخلانه

ألا ياللي تحب المصطفى حبه يريد إثبات
ماهوب حكي اللسان وسنته مناك عدمانه

ولا ياللي تريد الخير تب لله ودع مافات
ترى الله يغفر الذنب الكبير ويضفي إحسانه

حذاري تخر التوبه ترى ماتضمن الغارات
دقائق مع ثواني ثم يشال الرجل بكفانه

وباوصيك في شان الصلاة وخص في الأوقات
إلى منك سمعت الله واكبر فاقبل إعلانه

صلاتك هي صلاتك تنفعك ولا لك الحسرات
بيومن ينكشف فيه الغطاء ويشاف ديوانه

الا ياويل من ضاع الصلاة وتابع السهرات
بيومن تنفطر فيه السماء والناس سكرانه

الا ياللي تهاون فالصلاة أحذر من النكبات
غضب ربي إلا من جاك حطك وسط نيرانه

تغانم عمرك اللي ينحسب في دقت الساعات
وبالك لا تطيع النفس فن النفس خوانه

تريد علاج روحك فافتح آذانك وخذ وصفات
وصوف مجربه ماهوب حكي فلان وفلانه

عليك بخوّت اللي يخرجون وهم هل الطولات
يروح الرجل معهم ثم يعود زايد إيمانه

رجال (ن) ماهي ادور ورا بعض البشر مدات
تريد بفعلها وجه الولي وتريد رضوانه

هل التوحيد والدعوة هل الصولات والجولات
سلام الله عليهم عد غيثن هل ودانه

الا ياكم مريض قد صحبهم به مرض لافات
تبرى أبيه منه والجفى شافه من إخوانه

سقيم الحال من كثر المعاصي مع هل الغفلات
قلوب (ن) ميته وافكارها مناك خربانه

خذوه وعالجوه وكثروا في وجه البسمات
وزانت حالته ومن أولن بالحيل تعبانه

شفاه الله بحلقات الذكر والجهد والدعوات
ودرب الخير دله واتضح رمزه ونيشانه

حقائق بالعيون المبصره ماهيب منشورات
وخبر كل منهو فالمجالس يذرع لسانه

هذا جهد النبي معه الصحابه قاسوا الشدات
الين الله نشر لسلام فيه بحره وقيعانه

والا ياللي تسمع شد حيلك وأعزم النيات
قبل ذاك النهار اللي تشيب فيه ولدانه

ولا ننسى جهود الآخرين اللي لهم وقفات
دعاه الحق والاسلام كل (ن) حسب ميدانه

وصلى الله عدد من زار مكه ثم رمى الجمرات
على سيد البشر عد الشجر لا مالت أغصانه






الشاعر : راشد بن ناصر الابهق المري

المسرور
17-04-2015, 03:48 PM
حذاري تاخر التوبه ترى ماتضمن الغارات
دقائق مع ثواني ثم يشال الانسان بكفانه

صح لسان من قالها ويسلم من اختارها ،،

عنيزاوي
17-04-2015, 09:33 PM
وصح بدنك بنيابه عن ابو ناصر وكل قاصيده بالدعوه والدين جزاه الله خير

وسلم مرورك وتواجدك لاخلي ولاعدم

عقاري
28-07-2015, 02:38 AM
عفاك الله

وصح الله لسانك

ولاهنت

Dark angel
29-07-2015, 02:35 PM
آنتقآء رآئع يَ عنيزاوي
عفيت ~