المساعد الشخصي الرقمي

مشاهدة النسخة كاملة : صدقوني يستحق النقاش


نووْور~
11-11-2012, 11:05 PM
يسعد لي صباح ومساكم وكل اوقاتكم وجعلها الله عامره بالمسرات


بدون مقدمات


انا عملت في المجال الاداري والمحاسبه في اكثر من شركه وكم مشروع

واجهت صعوبات ومشاكل وزي مانقول كل دقه بتعليمه

والحمدلله كانت النتايج مشرف ومرضيه بشكل كبير جدا


المهم من فتره توجههت لمدرسه اهليه قلت اشغل وقتي الصباح فيها

ونطقطق بالليل في سبل الرزق اللي ربي مقدرها

بصراحه

واجهت صعوبه في التعامل بشكل لا يوصف ومشاكل لا تحصر

ونفسيات زفت والمجتمع العملي هناك سيء بدرجه اقسم بالله اني احترت اعبر فيها

الموظفات متناهيات السوء الا من رحم ربي

والله اني ما ابالغ


اما ان الاوان ان نقر حقا بان التعليم في المملكه بحاجه الى اعادة بناء الهيكله في التعاملات خصوصا في القطاع الخاص

وايضا القطاع الحكومي بحاجه الى وضع استراتيجيات وضوابط للتحكم في مجريات سير العمليه التعليميه

انا اتواصل مع معلمات المدارس الحكوميه بخصوص برنامج نور معلييييش الامر سيء اكثر مماتتوقعون

اسلوب مفيش طريقه حوار مفيش ايصال المعلومات طريقة الطلب والاخذ والرد مفيش

رحت لمكتب اشراف احد الاحياء تدرون وش واجهني اول مادخلت ؟؟!


عزيمه بخور وحافظات وسفره منا هنا لي هناك موفاضين للمراجعين

جيتهم مره ثانيه وطلبت من المشرفه الاداريه شغله ردت علي اللي معها لانها كانت مشغوله





تصلح كابتشينو وحاطه لك سلة شوكولاته بلجيكي على مكتبها تنقنق عليها
لما رجعت وسالت عن شغله ثانيه ياهم عصبو علي وعطوني ذيك النظره سحبت نفسي بابتسامه
وانا اقول في قلبي الله يخلف على التعليم بالمملكه

رحت لمكتب له وزنه وصارت الة تصوريهم ناشب فيها ورقه !! ماطلعت من عندهم الا 11 ونص ويالله وصلت المدرسه ويالله رجعت لبيتنا


هذا غيض من فيض بالنسبه للحكومي

اما عندنا بالخاص فحدث ولا حرج


الامر جدا فوضوي ومحزن بدرجه لاتوصف

بقولكم موقف حصل لي اليوم

رفيقتي اللي بالمكتب تصارحنا وتصادقنا وتشاركنا الخبزه والتميس

وكملنا بعض بشكل محد يتصوره صارت مثل اختي


نتكلم عن الاجحاف في رواتب الاداريات وان الاحقيه لهم بالزياده على هالشغل كله
قالت هنا محد يسمع قلت عاد مالهم حق هنا بشهرين مدخلين مبلغ وقدره

اتفاجا بزوجة صاحب المدارس تتصل علي تقول كم دخلنا هالشهرين قلت
ارسلك تقرير قالت لا ماتتذكرين كم هو قلت يعني مو مره قالت موب كذا وكذا
قلت الا بس وش دراك وانا ماسلمت لك ولا تقرير بهالخصوص
قالت دريت منك ! قلت كيف وانا ماقلت لك قالت انتي ماعندك حفظ للاسرار الماليه
ولا تصلحين لهالمكان الكل يدري ان المبلغ هذا هو مادخلناه وبعد تهزيئه وكلام
عرفت انه بلغتها اختي ورفيقت دربي مطالبتن اياها بفصلي وتعيينها مكاني !

الى هالدقيقه اللي اكتب فيها هالسالفه وهالكلام ماني مستوعبه بالذات هالموقف !!

طبعا في مواقف كثيره حصلت في هالمدرسه بشكل عجيب بس2 شهر و 14 يوم وهذا كله صار



ياجماعه ما انا لي سنتين استغل في المحاسبه وادرت ولله الحمد ثلاث مشاريع بنجاح تام وهذا من فضل ربي
بس فكرت اقضي وقت الصبح بشيء يرجع علي بالفايده والخبره ويالتني مافكرت صراحه




الخلاصه .. اما ان الاوان ان نقر بفشل التعليم عندنا استراتيجيه ومضمون ؟؟! بليز الكل يجاوب على هالسؤال بليز




السؤال الثاني

اما ان الاوان ان نمنح العقول المتفتحه والراقيه زمام الامور لتتسلم دفتها وتثمر ثمار افضل من هذا الموجود ؟؟


الحديث ذو شجون ومتفرع


اتمنى ان ارى مداخلات تثلج الصدر وتواسيني

وشكرا

نووْور~
11-11-2012, 11:08 PM
ملاحظه المدرسه اللي اعمل فيها صحيح اهليه بس لها وزن واسم يصدح في عالم المدارس الخاصه

ســــعود
11-11-2012, 11:59 PM
إن دّل فإنمآ يّدل على وّعيك وإهتمآمك وإحسآسك بالمسئولية وأمآنتك وغيّرتك على الأمّه
أأختِ
لي عّوده للمّوضوع إن شآء الله ’’

جمييلهـ ▲
12-11-2012, 12:34 AM
فعلا كارثة ي نور جيتي على الجرح

وربي لونكتب مجلاداات ما توفي الفشل الاداري في السلك التعليمي اللي حاصل
الحكومي خاصة , و طبعآ الخاص حدث ولا حرج كلن عايش في عالم ثاني
ومحسوبيات وشلالايات .. انا عندي تجربة مريرة مع المدارس الحكومية لما كنت اطبق
كيف كانوا يعاملون بنات التطبيق بكل احتقار واستهتار ولايوجد تعاون الا بشق الانفس
وكانك بتاخذي مكانها ووظيفتها .. شئ يجعل الطالبه تكرة شئ اسمه مدرسة وتعليم
اضافة لفشل المعلمات احيانا لتوصيل المنهج للطالبات لذا تخاف ان الطالبة اللى جايه عندهم
تكتشف الهوايل لذا يبدآآ باسلوب التسويف والا تتحسس انها افضل وانك انتي طالبه وماتوصلين لها
وانك ماراح توصلي المعلومه وبضيع حصصها عليك وكانك جايها عندها للاستجمام موللمهمه وانك ممكن
شرحك افضل منها وبشهادة طلاباتها الا ودهم تكملين معهم وارتفعت درجاتهم في ذيك الجزئيه ..
واما اذا كان اسلوبها حلو فعرفي انها تبي تستغللك بحصص الانتظار والمناوبات والا الاحلى تاخذ
تحضيرك ونشاطك و تنسبها لها بحاجة ان مافي احد راح يشوف تحضيرك غيرها اما هي راح تجيها
الموجهات و .... االخ . يعني ذا وش يسمونه من جد ؟؟
الزبدة نحن نعيش اسوء مرحلة في التعليم والادارة ولكن من يسمع الصوت ؟!
ويكثر الكلام وربي بس الله يعين يعني انتي رصدتي تجربه وانا بعض من تجربه
واكيد غيرنا ملايين يعاني من التجارب المريره .

نوووور الف شكر لفتح هذا النقاش

دمتي بكل خير ي الغلا

غنج نجد
12-11-2012, 05:06 AM
سعد صباحك أم حمود ...يابعد قلبي ...وماخفي اعظم ...

وانا راح اتكلم ع الاهلي ...لان الحكومي مالي فيه سواء مراجعات ...

ومدونتي تشهد ع أحد مراجعاتي الي استمرت بالانتظار فقط لتحديد المكاني للوظيفه قرابت 6ساعات هذا وانا من لطعه ...من الساعه 7ونص عندهم ..

المهم ماعلينا ...في اخطاء مانختلف لكن مانلقي الووم ابدا ع التعليم بل ع الاداراة الفاشله ...

الاهلي ..2000ريال ...وكرف طول الشهر ..

والنهايه السواق الخاص 350 ...والباقي تعالي ياوسائل تعليميه ..بمبلغ وقدره ...ماتهمني صراحه الفلوس بس التطوعي أشرف ع اللقل تعرفين انك موأجره ونيتك معرووفه أحسن من التسلبه واسمحي لي الي تقول ..نعطيكم رواتبكم ..ولانشوف شي ..دخلتس ودتس تقولين لها انخلى ..بس ..والله يطلعون الواحد من طوره ويخلونه يقول لهم كلام مايرضاه ...

وأخرتها لأزم اعطي بالوجه ..حبيبتي أنا مو محتاجه فلوستس أنا حبيبتي اكد ع عشرة زيتس ..قصدي فقط احس أمي عضو مساهم في المجتمع واقضي وقت فراغي بشي مفيد ..

وتزين وفصل وتسذا ..من غير مصرووفك الخاص والمجاملات الي مال امها داعي ..

مأاحد قال لاتجيبون وتفطرون ...بس صدقيني كله ع الاداره ...

في كفاءت انا اعرفها شخصيا معطائه وبقوة ولكن الاداره احبطتها ...وخلتها مجرد اله ..

وياويلك تغلطين ..الي الجحيم عزيزتي ...

وهذا احد مشاكلي ..لا كله كوم .. والمعامله الجميله كوم ...وياويلتس أن قلت ..للنقاش أسلوب او لاترفعين صوتس وكلميني بعقل ...يووووه ..مصيبه ..انتي كافره ..ماعليش بس جد كأنك طلعتي ع الدين ...

بس يبقى العتب أجمع مو عليهم ..ع الي يسلمهم المناصب وهم مو كفو ..وربي أضطريت اقول لوحده منهم ...

كرسيك كبير عليك ودي ارجعك الفصل وادرسك .. وطبعا من يومها ..وانا جالسه ..بالبيت ..هههههههه


عادي وانا اختك ..مانقول الا الشرهه مو عليكم .. ...الي يبي الخير لكم ..

اما الهيكله ومالهيكله ....وواكره الي يسوي ..لك جيمس باوند ..ومتاثر بفيقس ..يعنني حركات اختبار ...

جاتس الورق اقريه وانثبري ..ولا تسالين ..

شي يفقع المراره خليني ساكته احسن ...

ان ربي رزقني ان شاء بفتخ مدرسه خاصه ..وبوظفكم فيها ...ماعليش تحمست ...بس وربتس قهر ...

صارت القطاعات الخاصه المختلطه ارحم من ذا النسوان الاداريات اقلها يحترم انتس مره معه بالدوام ...وحده بيجيها الرشاش ...ههههههه

الله يوفقتس وانا اختس ..وترى دحا كله مو عندنا بس ..الكل يشتكي الا كوريا بالقطاع التعليمي ...هذا ماثبته الدراسات ..

ع العمووم التسخير من الله وانا اختس والرزق عليه سبحانه مانقول ..الا يامسخر سخر لنا ولهم يارب ...

اعذري هذرتي ..ولكن هذا الغيض من الفيض ..

وجبتيها ع جرحي وانا اختس ..

...

غزلان
12-11-2012, 06:56 PM
هذا بلا المدارس كلها خاصه وحكومية شووفة النفس وضيقة الخلق علي قل سنع علي وشووو شايفين عمارهم وهمهم الدراهم فقط
ولاهم طاقين خبر للطلاب ولا للدرووس ولا للتربية اقولس يانوووور ماعاد فيه اماااانة ولا اخلاااص ولا وفاااا هذا بختصار

يسلموووووو للموضوع

NORY
12-11-2012, 09:54 PM
السلام عليكم ورحمة الله وبركاته

من صدق موضوع يستحق النقاش والحل لكن السؤال المهم من نناقش ويسمع ويعطينا ؟؟

مانريد في هذا الموضوع يخطر على بالي المثل العامي <الشق اكبر من الرقعه>

بمعنى الامر يسمى من المنظور العلمي <فشل وسوء ادارة> واعطى المرء الغير مناسب المكان الغير هو كفى به!!


انا اجزم بل اقسم ان سوء الادارة المدرسية والجامعيه الخاص والعام يشمل جميع محافظات المملكة وكل مراجعه

او متواصلة معهم لهااا غصه

الغاليه والممزه نووور طرحك هذا من اجمل المواضيع القيمة التى طرحت بمنتديات الخبر

ولكن ياليت اصواتنا وشكونا هنا تصل لمن يهمة الامر ويحل المعضلة


لا

حيااة لمن تناادي

خفايا روح
13-11-2012, 12:28 AM
مساآآآآآء الورد ...... للجميع

كيفكم ؟ ان شاء الله بخير .....

نوؤؤر


خليني أتكلم معاك بعيداً عن الكابتشينو و الشوكولاته البلجيكي
أولا عن الشخصيات اللي قابلتيها
اعتقد أن هؤلاء خطأهم ينطلق من نفسهم...
أقصد التعامل والحوارات مفيش على حد تعبيرك ....اعتقد لأنو التواصل الاجتماعي مهارة عالية لايجيدها إلا قليل في مجتمع المعلمات
و هم ما عندهم هالمهارة
بالنسبة للمدارس بتكلم عن الحكومية بحكم تجربتي .......
حدث و لا حرج .....
لا تجهيزات و لا شي .....
أنا كل و سائلي وشغلاتي من حسابي
إلى جانب تصوير ورق العمل للمهمات الفردية للطالبات
أيضاً على حسابي ...... قليل من زميلاتي يعطون الطالبات دور بالتصوير
بس انا ما حبيت الطريقة منعاً لاحراج الطالبة ......
أيضاً هناك المعلومة اللي ماتوصل للطالبات ...... أنو بعض المعلمات تجيد مهارة البحث عن الشماعة دوماً
بمعنى أنهم يقولون ماعندنا وسائل ..... ما سوولنا دورات
والوزارة ما هي مقصرة .... صقلت مهارة اهمالهم بإنها قلبت الإنظمة و السجلات إلى أشياء
بصراحة متكتكة تبي لها طاقات شبابية >>>> بنات صغار أقصد
نظام التعليم بالمجموعات ..... سجلات متابعة الطالبة
و المعلمة تجيك لها 20 سنة خبرة قديمة
هي وين و التجديد وين ......
كيف بسهولة تغير طريقتها ..... أدت اللي عليها و نهضت بالتعليم سابقاً
و الحين أكيد أنها ملت
المفروض يجلسونهم فالبيت براتب كامل
و يعينون طاقات جديدة مدربة تمام التديب على كل الطرق اللي تبيها الوزارة
الله يعين بس
باختصار الوضع مزري .... مزري .... مزري حتى النخاع

شكراً لك
تقبلي مروري

مقاادير الازماان
14-11-2012, 01:59 PM
من زماااااااااان وحناا نقر بفشل التعليم .. وتعبناا وحنا نقول
وغيري وغيركم سعو لإصلاح مثل هذه المواضيع

لكن الحرامي فوقه حرامي والنصاب فوقه انصب منه ..



العين بصيره واليد قصيره .. ولا حياة لمن تنادي

حسبي الله ونعم الوكيل عليهم

A.J.M
06-02-2013, 04:44 PM
الكلام في تعليم هذا بحد امر موجع ومتعب للاسف لم تحاولين تحصرين المشكلة وين تكتشفين ان المشكلة متوزعه على اكثر من جهه اولا ضعف الكادر التعليم ؟
احد اهم اسبابه كليات المعلمين ولا احد يزعل مني بس متعارف بين الي مقدر يدخل هندسه او طب صار مدرس لان كليو المعلمين هي منزله من قدره بشكل كبير من الكل ولكن الاغلبية الي يدخلونه من اسواء الطلاب اخلاق وتعليما ودخولهم هو الرغبه في الحصول على دوام المريح والراتب المليح مثل ما يقول ولكن لو دوله جعلت اصعب تخصص الواحد يدخل ويخوض من اجله اختبارات وا ختبارات ونسبة عالية وجميع انواع التعقيد على شان بس يصير مدرس وبنفس الوقت الراتب مثل ماهو مافي اي زياده راح يدخل التخصص الشخص الي يرغب انه يكون معلم وليس مدرس

الان شخص الي يبغى يعلم اولاده كويس ويحفظهم صح يدخلهم مدارس خاص حتى لو كلفه اكثر من طاقته لان المدراس الحكومية و حتى ادارة الاشراف اصبحت عجوزه الزمن واقف فيه من غير تحرك وكل ما تجين تراجعين في ادارة اشراف يخلونك واقفه معهم والزمن يمشي الدوله انفقت المليارات على التعليم ولكن للاسف لم يستغل هذا الانفاق في مكانه.
المشكلة الاهم ي مملكتنا الحبيبه وزارة التخطيط ماله دور حقيقي في رسم دراسات وخطط مستقبلية تدرس في وضع المجتمع التعليمي والمجتمع السكاني وتقيس وتقارن بين مجتمعات ناجحه تعليميه وتقوم بعمل تطبيق هذه المجتمعات التعليمية هنا مثلا في نيوزلاند طالب المرحلة الثانوية يدرس في سنه 6 كتب فقط لان دراسة المانية اكدت ان طالب ما يتحمل عقله اكثر من 7 كتب العجيب هناك انك تدخل المدرسه يعطى قائمة تختار منه المواد الي تبغى تدرسه تدخل الصف المدرس جالس تقراء الكتاب عندك سوال تسال حاس انك فهمت تطلب من المدرس الاختبار يعطيك ورقه اختبار وتعدي المرحله طبعا له اليه ان المفروض خلال فترة الثانوية تدرس 20 كتاب اوحاجه كذه يعني انت ممكن بذكاء تخلص المرحله الثانوية بسنه ونص بالاضافه في اغلب دول العالم المدراس من غير اسوار حراس على الابواب منعا لخروج الطلاب لا شعارهم تبغى تتعلم الباب مفتوح ما تبغى هذا راجع لك والغريب تجدون ان الجميع ملتزم بالوقت والحضور الانصراف ولكن عندنا في عالمنا العربي اعتبر المدراس عبارة عن معتقل تعليمي يعني تدخل الفصل تحبس في الا ان يجي وقت الاستراحه ودائما خروج ودخول طلبه بطريقه همجية وغنمية تلقون طلاب يركضون ورائهم مدرسين بعصي

اسف جدا طولتتتتتتتتت لان موضوع التعليم عند مش ناقصه ميزانية ولا ناقصه معدات ناقصه معلمين حقيقيا بالاضافه الى روح وطنية تبحث وتسعى الى كل ما هو جديد
وللحديث بقية ......

غروب الشمس
06-02-2013, 05:34 PM
يعطيك العااااافية اختي على هالموضوع ومبين عليك انسانه واعية بس صدقي هفوات التعليم وين ماجيتي حتى عندنا بالاردن موجود مثل هالامور وانا لا اتكلم من فراغ بل كوني في الميدان التعليمي وكل يوم تواجهني الكثير من العقبات والمصاعب مرة ثانية يعطيك الف عافية