المساعد الشخصي الرقمي

مشاهدة النسخة كاملة : يافضيحتك ياأبو سعد


حُلم
20-06-2010, 03:33 PM
السلام عليكم ورحمة الله وبركاته
كيفكم،، عسآكـ،م طيبين

المهم الموضوع هذا افكر فيه من فترة..
اللي هي موضوع العادات والتقاليد اللي ورثناها من أجدادنا..
وماأساسها وهل تطبيقها لازم، وهل من تخلف عنها بظرف او غيره اصبح في غير مصاف الرجال

راح اتكلم عن الموضوع بقصة قصيرة من جعبتي..

ابو سعد رجل من قبيلة عريقة لها عادات وتقاليد عريقة، حالته المادية متوسطة يكفيه راتبه الى ماقبل نهاية الشهر بـ خمس ايام..
عنده أخ في مدينة بعيدة ..، في يوم من الايام تلقى ابو سعد مكالمة هاتفية.. من اخوه ابو طلال.. واخبره فيها انا قادم الى زيارته
ففرح ابو سعد لهذا الخبر،،
وفي اليوم التالي جاء ابو طلال واسرته..، وهلل ابو سعد ورحب بمقدم اخيه،،
لايخفى عليكم انه يجب اكرام الضيف.. ولكن اليوم هو العشرين من الشهر وابو سعد لايملك النقود الكافية
لاأكرام اخيه بالشيء المتعارف عليه الا وهو الذبيحة... فقرر ابو سعد
ان يقدم لأخيه عوضا عن ذلك دجاج ----> ياللهول دجاج مره وحدة يافشيلتك قدام سلوم العربان والقبايل
انا بقول وش فيها...!؟
الضيف يأكل من زاد البيت ومافيه لزوم اني اروح اتدين عشان اذبح ذبيحة واضيق على اسرتي الشهر القادم في المصاريف...،
المهم جا العشا.. وتفاجأ ابو طلال عندما رأى الدجاجات ملقاة على الاناء ولكنه توكل على الله وغمس يديه في الارز..
وبعد ذلك قام سعد ولد المدعو ابو سعد بتقديم القهوة االعربية..
ولكن بدون معرفة وأدراك قام بملأ الفنجان ولم يملأه حتى الربع كما تقول عادات صب القهوة..---> يافضيحتك ياأبو سعد
دجاج وبعد عيالك مايعرفون يصبون قهوة.. وآآآسفآآهــ،
ثم خرج ابو طلال ووجد صديق طفولته ابو سلمى في الجوار
فحكى له ماحصل بحرقة
وقال: لقد قدم لي الدجاج وملأ لي ابنه فنجان القهوة
فقال ابو سلمى ياألهي وانتشرت القصة في القرية واصبح ابو سعد على كل لسان..

نقاط الحوار::
هل ترى تصرف ابو سعد صحيح؟
هل بعض العادات مثل صب القهوة بالطريقة الصحيحة اذا نفذت بطريقة خاطئة اصبح الرجل مخطئ وعار عليه(مثال فقط) ..؟

..

طبعا انا ماأقول انو لازم نمحي العادات والتقاليد.. بس فيه بعضها صراحة ماله داعي.. او بالاحرى لايجب التقيد بها اذا ماكانت عندي القدرة
مثل اني اكلف على نفسي عشان ليلة وحدة واضيق على اسرتي شهر كامل....،

ابي ارائكم..

نووْور~
20-06-2010, 06:53 PM
هل ترى تصرف ابو سعد صحيح؟

نعم , ليه أضيق على عيالي بسبب ضيف واحد , الناس بتنقد لكن عيالي بيجوعون وأنا بتسلف وبتوهق على ما أوازن الميزانيه علشان ذبيحه نصها بيقعد في الصحن

هل بعض العادات مثل صب القهوة بالطريقة الصحيحة اذا نفذت بطريقة خاطئة اصبح الرجل مخطئ وعار عليه(مثال فقط) ..؟

نعم ليه مايعلم عياله المرجله وحسن استقبال الضيف وعلوم الرجايجيل السنعه

..

وجهة نظر
20-06-2010, 07:36 PM
أخوي ... حلم ... هذه القصه أتوقع أنها واقعيه ...

والكرم من شيم العرب وتتوارثه الأجيال

لكن الآن الوضع تغير عن السابق ... لمّـا يجيك ضيف ... راح تشتري الذبيحه(خروف) بأقل سعر 850 ريال وتطبخها 150 ريال صارت التكاليف 1000

يعني نتخيل واحد راتبه 1500 ريال ... وش .. بقى من الراتب !!!

يعني إذا جاك ضيف وأنت هذا وضعك ... أطعمه من ما في بيتك ...

وإذا شفته أنزعج من الوضع !!! . أعرف أنه مريض نفسياً ... أو عنده عقدة النقص ...

وأمّـا صبت فنجان القهوة نص وإلاّ ربع ... هذِ مااال أمها داااعي ...

ومشكووور ...

الصارم
20-06-2010, 08:22 PM
نعم ارى ان تصرفه خطاء 100% اول شي ياعزيزي الكرم من شيم الرجال
والله ان اكرام الضيف مايضق غير على الضعيف من الرجال
اكرام الضيف اذا انت ناويه صدقني الله يسهل عليك ذالك
اهم شي لاتتضجر وتقول في خاطرك مثل اقاويل الضعوف
والله سبحانه امر باكرام الضيف والرسول عليه الصلاة والسلام حث على ذالك
بعدين لاتنظر الى الراتب وتحلس تحسبه ويش يكفي ويش مايكفي
اعقلها وتوكل واكرم ضيفك ولا تهتم
بيعدين خلونا نتكلم بواقع هل احد منكم يستطيع ان يقدم لضيفه دجاحه
او سمك او مشويات وابي اجابه بالامانه
ثانيآ القهوه كيف والكيف اذا تعدى حده مصار كيف
ورجل لابد ان يعلم اعياله على العادات وتقاليد
مشكور على هذا الطرح

حُلم
20-06-2010, 08:35 PM
هل ترى تصرف ابو سعد صحيح؟

نعم , ليه أضيق على عيالي بسبب ضيف واحد , الناس بتنقد لكن عيالي بيجوعون وأنا بتسلف وبتوهق على ما أوازن الميزانيه علشان ذبيحه نصها بيقعد في الصحن

هل بعض العادات مثل صب القهوة بالطريقة الصحيحة اذا نفذت بطريقة خاطئة اصبح الرجل مخطئ وعار عليه(مثال فقط) ..؟

نعم ليه مايعلم عياله المرجله وحسن استقبال الضيف وعلوم الرجايجيل السنعه

..



اوكي نحسن استقبال الضيوف.. انا معك بهالشي
بس اما اذا عبيت الفنجال ماهي مرجلة مره اسمحلي
بعض العادات اللهم ياحافظ مدري من وين جاية..
اجل اذا عبيت لك الفنجال اطيح من عينك ليه ..

حُلم
20-06-2010, 08:36 PM
أخوي ... حلم ... هذه القصه أتوقع أنها واقعيه ...

والكرم من شيم العرب وتتوارثه الأجيال

لكن الآن الوضع تغير عن السابق ... لمّـا يجيك ضيف ... راح تشتري الذبيحه(خروف) بأقل سعر 850 ريال وتطبخها 150 ريال صارت التكاليف 1000

يعني نتخيل واحد راتبه 1500 ريال ... وش .. بقى من الراتب !!!

يعني إذا جاك ضيف وأنت هذا وضعك ... أطعمه من ما في بيتك ...

وإذا شفته أنزعج من الوضع !!! . أعرف أنه مريض نفسياً ... أو عنده عقدة النقص ...

وأمّـا صبت فنجان القهوة نص وإلاّ ربع ... هذِ مااال أمها داااعي ...

ومشكووور ...

معك انا كلامك صحيح والله..
والقصة انا قد قريت حاجة زي كذا بجريدة.. وبس زودت عليها وكذا
ومشكور على ردك..

حُلم
20-06-2010, 08:39 PM
نعم ارى ان تصرفه خطاء 100% اول شي ياعزيزي الكرم من شيم الرجال
والله ان اكرام الضيف مايضق غير على الضعيف من الرجال
اكرام الضيف اذا انت ناويه صدقني الله يسهل عليك ذالك
اهم شي لاتتضجر وتقول في خاطرك مثل اقاويل الضعوف
والله سبحانه امر باكرام الضيف والرسول عليه الصلاة والسلام حث على ذالك
بعدين لاتنظر الى الراتب وتحلس تحسبه ويش يكفي ويش مايكفي
اعقلها وتوكل واكرم ضيفك ولا تهتم
بيعدين خلونا نتكلم بواقع هل احد منكم يستطيع ان يقدم لضيفه دجاحه
او سمك او مشويات وابي اجابه بالامانه
ثانيآ القهوه كيف والكيف اذا تعدى حده مصار كيف
ورجل لابد ان يعلم اعياله على العادات وتقاليد
مشكور على هذا الطرح



هذا رأيك وانا احترمه..
لكن مايصير اصير كريم مع ضيوفي..
واسرتي اضيق عليها.. حتى ربي مايرضى بهالشي.. ولا انا غلطان بعد؟
اوكي اعلمهم المرجلة، بس فيه اشياء مالهاد داعي واذا ماسويتها مو معناتها اني ناقص مرجلة..

نووْور~
20-06-2010, 09:26 PM
اوكي نحسن استقبال الضيوف.. انا معك بهالشي
بس اما اذا عبيت الفنجال ماهي مرجلة مره اسمحلي
بعض العادات اللهم ياحافظ مدري من وين جاية..
اجل اذا عبيت لك الفنجال اطيح من عينك ليه ..

من قالك انك بتطيح من عيني يا لأخو !!!

قصدي لازم الرجال يعلم عياله وشلون يحسنون استقبال الضيوف ويكرمهم

علشان يتمرجلون على العلوم السنعه وصبة القهوه وشبة النار والسواليف الطيبه

وبعدين اذا عبيت الفنجال مره يعني وشقصدك اشرب هالفنجال وبس خلاص !!!

الصارم
20-06-2010, 09:30 PM
هذا رأيك وانا احترمه..
لكن مايصير اصير كريم مع ضيوفي..
واسرتي اضيق عليها.. حتى ربي مايرضى بهالشي.. ولا انا غلطان بعد؟
اوكي اعلمهم المرجلة، بس فيه اشياء مالهاد داعي واذا ماسويتها مو معناتها اني ناقص مرجلة..

ياعزيزي الكريم مع ضيفه كريم مع اسرته بكل تاكيد
ومن الي اوهمك وقال نا الي يملاء الفنجان انه ناقص مرجله
هذه مالها دخل في المراجل هذه عوايد
بعدين ياخي انا ماقلت انه نقص مراجل اجابتي واضحه انا قلت
يعلم اعياله العوايد والتقاليد
بس انا بسئلك انت تقدر تقدم لضيفك دجاجه حتى لو ضروفك ماتساعدك

نووْور~
20-06-2010, 09:33 PM
والله سبحانه امر باكرام الضيف والرسول عليه الصلاة والسلام حث على ذالك


والله سبحانه وتعالى قال ( لايكلف الله نفساً إلا وسعها )
الرسول صلى الله عليه وسلم قال (كلكم راع وكلكم مسئول عن رعيته )

وش بسوي برعيتي باقي الشهر من وين بوكلهم واشربهم على بالك المسئوليه سهله
ياما رجال وقف قدام الصيدليه يبكي يبي قيمة حليب ولده
واخو ابو سعد يتنقد يبي ذبيحه !!!

بيعدين خلونا نتكلم بواقع هل احد منكم يستطيع ان يقدم لضيفه دجاحه
او سمك او مشويات وابي اجابه بالامانه

أيه انت ماتعرف أنه في الفتره الأخيره كثرت البوفيهات المنزليه
وصار العشاء يحوي أصناف بسيطه وكثيره
تشبع الضيف وزياده




واختلاف الرأي لايفسد للود قضيه :)

¨°•][ يًسِألوٍنيًـےليًـــہ أحِبُـگ]
20-06-2010, 09:51 PM
موضوع جميل يستحق النقاش يسلمك ربي
ج سؤالك الاول:
أحنا تحكمنا عادات وتقاليد .. لو كان موضوع الضيافه بينك وبين الضيف اتوقع عادي..

ولكن ركز على عمر الضيف اذا كان كبير بالسن لازم ذبيحه وذبيحه كبيرة بعد ..

ولو بروح يقول فلان ماطلع لابوة ..((اقصد جدو وبابا)) مافيه خير .. ومن هذا الكلام ..

بس لمن يكون حول المرحله العمريه مو شايب يعني أعتقد ان المساله ماتحتاج الاحلاف ..

لانه بيكتفي بتقديرك له واحترامك ودفعك المبلغ الفلاني في ذالك الفندق او المطعم ..

خلاصة الكلام على حسب الشخص وعمرة ومن وين جاي ((اقصد اذا كان جاي من الديرة)) يعني صعبه لازم ذبيحه مايبيلها كلام ومعها حركات الحلا ..وببسي ومقبلات وفواكه

واكلات شعبيه بعد تعرف الشيبان .. واعزم جارك الي سوالفه في المجلس ماتخلص ..

عشان ينبسط الضيف ..

وهي مرة بالشهر او السنة يعني ماراح تكلفة لو تخفض ميزانيته هالشهر .

وانا ارى من الصعب تقديم دجاجه تكريما للضيف الذي ياتيني بعد فترة من الزمن .

حديث المصطفى ((من كان يؤمن بالله واليوم الاخر فليكرم ضيفه ))

ج سؤالك الثاني

صبوا لي الكيف وارهولي من الدله البن الاشقر يدواي الراس فنجاله

ضروري كمان هذا عادات وتقاليد القهوة وبمعايير معينه << عادات تورط الواحد ههههههههههههههه

الحمدلله مو عندنا بالمجتمع النسائي لاكن الرجال عيب تملا الفنجال الا بمقدار شربه واحدة كيف ههههههههههههههههههههه

وهذا عادات وتقاليد لاتتغير
الف شكر على موضوعك

تحياتي وتقديري

نووْور~
20-06-2010, 09:54 PM
^^
درر يسلم بؤك يايسألوني ليه أحبك

بدوية نجد
20-06-2010, 10:20 PM
هل ترى تصرف ابو سعد صحيح؟
نعم والجود من الموجود ومن راقب الناس مات هما,,

هل بعض العادات مثل صب القهوة بالطريقة الصحيحة اذا نفذت بطريقة خاطئة اصبح الرجل مخطئ وعار عليه(مثال فقط) ..؟

نعم تبقى لنا بعض الثوابت الراسخه لو تساهلنا بها ضاع بعضنا ومن لايعرف مقدار صب قهوة الضيف فكبر عليه اربع قبل وفاته ..

حُلم
20-06-2010, 10:26 PM
من قالك انك بتطيح من عيني يا لأخو !!!

قصدي لازم الرجال يعلم عياله وشلون يحسنون استقبال الضيوف ويكرمهم

علشان يتمرجلون على العلوم السنعه وصبة القهوه وشبة النار والسواليف الطيبه

وبعدين اذا عبيت الفنجال مره يعني وشقصدك اشرب هالفنجال وبس خلاص !!!


انا الان ماأقصدك انت..،
لكن بشكل عام انا شفت هالمواقف قدام عيني..
وانا معك لازم الرجال يعلم عياله استقبال الضيوف.. وكذا
وبالنسبة لقضية الفنجال انا حبيت اضعها كمثال..،
وبالمنطق برضو من قال اذا عبيت الفنجال اقولك يلا اطلع خلاص..
اجل كاس الشاهي ليه يتعبا لاخره ولا الشاهي غير عن القهوة ولا وش فهمني..؟

حُلم
20-06-2010, 10:29 PM
ياعزيزي الكريم مع ضيفه كريم مع اسرته بكل تاكيد
ومن الي اوهمك وقال نا الي يملاء الفنجان انه ناقص مرجله
هذه مالها دخل في المراجل هذه عوايد
بعدين ياخي انا ماقلت انه نقص مراجل اجابتي واضحه انا قلت
يعلم اعياله العوايد والتقاليد
بس انا بسئلك انت تقدر تقدم لضيفك دجاجه حتى لو ضروفك ماتساعدك



طيب بعض العوايد، مالها داعي وماعلي ملامة اذا ماسويتها
وبالنسبة لي اذا جاني ضيف وظروفي ماتسمح بحط له دجاج، ماعندي مشكلة
اهم شي ان ربي راضي عني.. وماعلي من كلام احد، كلام الناس لايودي ولايجيب وكلها نعمة يارب لك الحمد

حُلم
20-06-2010, 10:30 PM
واختلاف الرأي لايفسد للود قضيه :)



صدقت اخوي...

حُلم
20-06-2010, 10:35 PM
[ يًسِألوٍنيًـےليًـــہ أحِبُـگ];813637']موضوع جميل يستحق النقاش يسلمك ربي
ج سؤالك الاول:
أحنا تحكمنا عادات وتقاليد .. لو كان موضوع الضيافه بينك وبين الضيف اتوقع عادي..

ولكن ركز على عمر الضيف اذا كان كبير بالسن لازم ذبيحه وذبيحه كبيرة بعد ..

ولو بروح يقول فلان ماطلع لابوة ..((اقصد جدو وبابا)) مافيه خير .. ومن هذا الكلام ..

بس لمن يكون حول المرحله العمريه مو شايب يعني أعتقد ان المساله ماتحتاج الاحلاف ..

لانه بيكتفي بتقديرك له واحترامك ودفعك المبلغ الفلاني في ذالك الفندق او المطعم ..

خلاصة الكلام على حسب الشخص وعمرة ومن وين جاي ((اقصد اذا كان جاي من الديرة)) يعني صعبه لازم ذبيحه مايبيلها كلام ومعها حركات الحلا ..وببسي ومقبلات وفواكه

واكلات شعبيه بعد تعرف الشيبان .. واعزم جارك الي سوالفه في المجلس ماتخلص ..

عشان ينبسط الضيف ..

وهي مرة بالشهر او السنة يعني ماراح تكلفة لو تخفض ميزانيته هالشهر .

وانا ارى من الصعب تقديم دجاجه تكريما للضيف الذي ياتيني بعد فترة من الزمن .

حديث المصطفى ((من كان يؤمن بالله واليوم الاخر فليكرم ضيفه ))

ج سؤالك الثاني

صبوا لي الكيف وارهولي من الدله البن الاشقر يدواي الراس فنجاله

ضروري كمان هذا عادات وتقاليد القهوة وبمعايير معينه << عادات تورط الواحد ههههههههههههههه

الحمدلله مو عندنا بالمجتمع النسائي لاكن الرجال عيب تملا الفنجال الا بمقدار شربه واحدة كيف ههههههههههههههههههههه

وهذا عادات وتقاليد لاتتغير
الف شكر على موضوعك

تحياتي وتقديري




هههههههههههه
انا معك بكلامك...،
وفيه بعض عاداتنا مثل الكرم وكذا عادات حلوة وامر بها الاسلام...
بس المثل يقول الجود من الموجود.. وفيه ناس والله اوضاعهم صعبة..
يعني تخيلي سوا ذبيحة.. بالف وخمسمية وراتبه الفين..
وشلون بيعيش باقي الشهر يروح يتدين مثلا..؟
والله صعبة..
انا عندي اقدم لهم من الموجود ولا اني اروح اتدين من الناس بوجهة نظري..
وبالنسبة للفنجال والكيف ومدري وشو..
انا نفسي ماحب اعبي الفنجال بالعكس احب احط شربة وحدة..
بس انا اتكلم عموما عن بعض العادت اللي اذا ماسويتها مو ضروري تنقص هيبتك او تخلي الناس يتكلمون عنك..
زمنورة والله.. ^^

حُلم
20-06-2010, 10:38 PM
هل ترى تصرف ابو سعد صحيح؟
نعم والجود من الموجود ومن راقب الناس مات هما,,

هل بعض العادات مثل صب القهوة بالطريقة الصحيحة اذا نفذت بطريقة خاطئة اصبح الرجل مخطئ وعار عليه(مثال فقط) ..؟

نعم تبقى لنا بعض الثوابت الراسخه لو تساهلنا بها ضاع بعضنا ومن لايعرف مقدار صب قهوة الضيف فكبر عليه اربع قبل وفاته ..


اهلن بدوية.،.
ثوابت راسخة اوكيه.. بس الاخلال بها مايعني اهانة الضيف.. ممكن تكون سقطت سهوا

حُلم
20-06-2010, 10:39 PM
ياأخوان اشكركم ع الحوار الراقي
بس ابوضح نقطة لاتتعمقون في شغلة الفنجال
انا ضربت مثال بها بس..

الصارم
20-06-2010, 10:43 PM
وش بسوي برعيتي باقي الشهر من وين بوكلهم واشربهم على بالك المسئوليه سهله
ياما رجال وقف قدام الصيدليه يبكي يبي قيمة حليب ولده
واخو ابو سعد يتنقد يبي ذبيحه !!!
اخوي الله لايجيب هذا اليوم الي يقف الواحد عند الصيدليه مايقدر يشتري حليب ولده
ولاكن بقولك حاجه والله لو قدرت الرجال وكرمتهم وقمت بحقهم
ماحد يتركك تقف على باب الصيدليه وان اقرب واحد منهم ليقدم لك العون
والي يقف امام الصيدليه يسئل الناس هذا ضعيف حيله
لان ماعنده وجهه يقوده لربعه معارفك ارحم من ان تسئل الخلق الي ماتعرفهم



أيه انت ماتعرف أنه في الفتره الأخيره كثرت البوفيهات المنزليه
وصار العشاء يحوي أصناف بسيطه وكثيره
تشبع الضيف وزياده
ياخي لاتعتقد ان الضيف يوم شرفك انه ميت جوع ولا يشبعه الا الذبيحه
هذا واجب لضيفك



واختلاف الرأي لايفسد للود قضيه
ان شالله مابه اختلاف انت فتحت موضوع وتناقش انا وانت وجميع الاعضاء بكل صدر رحب
وكل واحد يقول الي يبيه وهذا رايي وانت لك راي
ولك شكري وحترامي

نووْور~
20-06-2010, 11:00 PM
صمت الغروب معرف لأنثى رعاكم الله

نووْور~
20-06-2010, 11:06 PM
اجل كاس الشاهي ليه يتعبا لاخره ولا الشاهي غير عن القهوة ولا وش فهمني..؟

الله يسلمك فيه فرق عن تقديم القهوه والشاهي
فنجال القهوه لمابتعبى على الأخير مشكله أصلن في مسكته

كأس الشاهي له عروه أمسكه فيها على كيفك
فضلاً عن التكبب والرجفه لأن اللي بيملاه لك على الأخيرماراح يعرف يمده لك

الشاهي مو كلن يشربه ناس ايه وناس لا عادي
لكن القهوه نادر ماتلقى ضيف يدخل بيتك يرد الفنجال لويشرب واحد مجامله

وفيه مواجيب لازم الواحد يكرم ضيوفه فيها لو جاء له أحد

نووْور~
20-06-2010, 11:07 PM
وش بسوي برعيتي باقي الشهر من وين بوكلهم واشربهم على بالك المسئوليه سهله
ياما رجال وقف قدام الصيدليه يبكي يبي قيمة حليب ولده
واخو ابو سعد يتنقد يبي ذبيحه !!!
اخوي الله لايجيب هذا اليوم الي يقف الواحد عند الصيدليه مايقدر يشتري حليب ولده
ولاكن بقولك حاجه والله لو قدرت الرجال وكرمتهم وقمت بحقهم
ماحد يتركك تقف على باب الصيدليه وان اقرب واحد منهم ليقدم لك العون
والي يقف امام الصيدليه يسئل الناس هذا ضعيف حيله
لان ماعنده وجهه يقوده لربعه معارفك ارحم من ان تسئل الخلق الي ماتعرفهم




أيه انت ماتعرف أنه في الفتره الأخيره كثرت البوفيهات المنزليه
وصار العشاء يحوي أصناف بسيطه وكثيره
تشبع الضيف وزياده
ياخي لاتعتقد ان الضيف يوم شرفك انه ميت جوع ولا يشبعه الا الذبيحه
هذا واجب لضيفك



واختلاف الرأي لايفسد للود قضيه
ان شالله مابه اختلاف انت فتحت موضوع وتناقش انا وانت وجميع الاعضاء بكل صدر رحب
وكل واحد يقول الي يبيه وهذا رايي وانت لك راي
ولك شكري وحترامي


كلام سليم ميه ميه
لكن المثل يقول مد رجولك على قد لحافك
وأهم الشيء الجمعه والوناسه :)

أبوشهد
20-06-2010, 11:34 PM
أعجبني النقاش الرائع

وتعليقي على الموضوع :

العادات والتقاليد ليست آيه منزله

قد تتغير مع تغير الظروف والازمان

الامر الاهم في الموضوع ليس العادات والتقاليد

إنما الاخ ابوطلال

الذي لم يقدر حالة أخيه وهو خير من يعلم بحاله

ثم بعد ذلك يذهب الى صديق لـ يخبره بما حصل في بيت أخيه

هل هذه أخوه وهل العمل بالعادات والتقاليد تجعلك تفضح أخيك لدى الناس

إذا العادات والتقاليد سوف تعمل على إفساد الأخوه بمثل اللي حدث من قبل ابوطلال

اقول لا بارك الله فيها من عادات وتقاليد خرفه ..!!

أخواني

هناك أمر أكبر من العادات والتمسك بها وهي :

روح العائلة والأخوه الصادقه والعمل على إيجاد العذر دائماً

لأخيك رغم تقصيره تجاهك والله ما يجي يوم وافضح أخي عند أصدقائي او جماعتي عشان عاده او تقليد ..!!

لعلي وضحت وجهت نظري تجاه القصه ولم اتوقف عند تساؤل الكاتب ..!!

نووْور~
21-06-2010, 12:26 AM
يعجبني تفكيرك يابوشهد (( تفكير خارج الصندوق )) وعز الله أنك كفو وراعي العلوم الطيبه
والله يخلي لك اخوانك ويخليهم لك ويديم بينكم روح الأخوه والموده

هــــــــــــذا أنا
21-06-2010, 04:40 AM
مشكور حلم موضوع تستاهل احلى تقييم أنا أنسانه أحب أكرم ضيفي وابي أحط كل اللي عندي ودي اشيله من على الارض شيل لكن تعلمت اذا جاني ضيف ما انزعج وحياه الله بس الجود من الموجود مو معناته اذا ما قدرت احط ذبيحه معناه متضايق من دخلته بيتي ولا معناه عجز مني لكن بعض الاوقات تمر على الواحد/ه ظروف ما يعلم فيها اللى رب العالمين هو عالم بالنوايا وعالم قد ايش ودي اسوي اي شي بس ضيفيِِ يطلع من عندي راضي وانا اقول يا فضيحة اخوك يابو سعد لان الاخ في ذا الوقت ما راعى ظروفه ولا فكر ان اخوه على قده ولو هي ذبيحه ما عشته وخلى اخوه سيرته على كل الناس ما قال كثر خيره يكفي ما تردد وقال حياك يا اخوي وبعدين يا كثر ذبايحنا وعلوم المرجله ويا اكثر منها دينها على نهاية ها الشهر وكثر ما راح ينزل الهم بصاحبها خلكم واقعيين الناس تشتكي من غلا الاشياء البسيطه مثل الحليب والرز وتضرب كف على كف وانتو علوم الرجاجيل علومهم وقف مع اخوك يا اخوي ما ابي اضيق عليك يا اخوي محتاج ترى ما يردك الا لسانك فكر في وش بيحطله بتعبي بطنه ولا لا عايش تناقض ما ادري متى نطلع منه وبعدين صبة القهوة عاده اتعجب لها عمر الولد كم ولو فيه خير اخذ ولد اخوه على جنب وعلمه صبة القهوه وعلوم الرجال من جد الله يعينا على انفسنا بعد ها المرجله علوم التبذير اكرمناهم واخذنا ذنب ويا كثر الذبايح اللي ما المست وعارفين وين اتصرفت وغيرنا يدور اللقمه وتقولن علوم العلوم حب لاخيك داريه وقف معه روحله في ضيقه بصلتك له مو ذبيحه وفنجال قهوه

سعووفه
22-06-2010, 05:22 AM
مرااااااحب
رضـــــا الناس غاية لا تدرك
لو ابو سعد اعتذر من اخوة واجلة لوقت ماتتوفر معاة دراهم الذبيحة كان قال صرفني
وماعذرة لسوء ظروفة
وحطلة دجاج وماعجبة واكرمة بالقهوة وماعجبة صبة القهوة ولو هو قلبة على اخوة
كان اخذ ولد اخوةوعاتبة وشرح لة الوضع وكيف وعلمة علوووم الرجاجيل وصبة القهوة
وبني ادم ماخلقت متعلمة ولكن تتعلم!!!!!!!!
واذا كان على الدجاج عااادي الجود من الموجود وهو مو عريب هذا بيت اخوة
وكان سال اخوووة وقالة محتاج شي يمكن متسلف حق الدجاج
والمفروض عذرة لان هذا اخوة والتمس لة العذر ولو كان حط لة ذبيحة كان قال الطبخ سي
وليش التبذير والفشخرة الكذابة مد لحافك على قد رجليك ولا يكلف الله نفسا الا وسعها
وراي ان ابو سعد بيض اللة وجة وماقصر بس العين بصيرة واليد قصيرة
ويمكن راتبة مايكفي يجيب ذبيحة اذا كان من ذوي الدخل المحدود يجيب ذبيحة وطول الشهر يمد يدة
لفلان وعلان يتسلف مصروف بيتة وعيالة ويكون بنظر اخوة رجل ومقدرة
ماقصرت يابو سعد ولايهمك كلام الناس لان لايحذف بالحجر الا اعالي القمم

حُلم
22-06-2010, 06:36 PM
صمت الغروب معرف لأنثى رعاكم الله





اسف اختي..،،

حُلم
22-06-2010, 06:40 PM
الله يسلمك فيه فرق عن تقديم القهوه والشاهي
فنجال القهوه لمابتعبى على الأخير مشكله أصلن في مسكته

كأس الشاهي له عروه أمسكه فيها على كيفك
فضلاً عن التكبب والرجفه لأن اللي بيملاه لك على الأخيرماراح يعرف يمده لك

الشاهي مو كلن يشربه ناس ايه وناس لا عادي
لكن القهوه نادر ماتلقى ضيف يدخل بيتك يرد الفنجال لويشرب واحد مجامله

وفيه مواجيب لازم الواحد يكرم ضيوفه فيها لو جاء له أحد




طيب الكابتشينو..؟ اعبي الكوب ولا لا لانها كلها قهوة... تحتوي على البن
ع العموم بماأنها عادات ورثوها لنا اجدادنا.. ليش مانغيرها..!
ونسوي عادت جديدة.. مثلا بدل القهوة نقدم موكا ولا لاتيه.
ويصيرون احفادنا يتبعودن عاداتنا الجديدة..
احس لازم نغير شوي

حُلم
22-06-2010, 06:42 PM
أعجبني النقاش الرائع

وتعليقي على الموضوع :

العادات والتقاليد ليست آيه منزله

قد تتغير مع تغير الظروف والازمان

الامر الاهم في الموضوع ليس العادات والتقاليد

إنما الاخ ابوطلال

الذي لم يقدر حالة أخيه وهو خير من يعلم بحاله

ثم بعد ذلك يذهب الى صديق لـ يخبره بما حصل في بيت أخيه

هل هذه أخوه وهل العمل بالعادات والتقاليد تجعلك تفضح أخيك لدى الناس

إذا العادات والتقاليد سوف تعمل على إفساد الأخوه بمثل اللي حدث من قبل ابوطلال

اقول لا بارك الله فيها من عادات وتقاليد خرفه ..!!

أخواني

هناك أمر أكبر من العادات والتمسك بها وهي :

روح العائلة والأخوه الصادقه والعمل على إيجاد العذر دائماً

لأخيك رغم تقصيره تجاهك والله ما يجي يوم وافضح أخي عند أصدقائي او جماعتي عشان عاده او تقليد ..!!

لعلي وضحت وجهت نظري تجاه القصه ولم اتوقف عند تساؤل الكاتب ..!!


لبى قلبك، دخلت بصلب الموضوع..
ماشاءالله عليك لافض فوك، هذا اللي ابي اوصله..
مشكور الف شكر

حُلم
22-06-2010, 06:46 PM
مشكور حلم موضوع تستاهل احلى تقييم أنا أنسانه أحب أكرم ضيفي وابي أحط كل اللي عندي ودي اشيله من على الارض شيل لكن تعلمت اذا جاني ضيف ما انزعج وحياه الله بس الجود من الموجود مو معناته اذا ما قدرت احط ذبيحه معناه متضايق من دخلته بيتي ولا معناه عجز مني لكن بعض الاوقات تمر على الواحد/ه ظروف ما يعلم فيها اللى رب العالمين هو عالم بالنوايا وعالم قد ايش ودي اسوي اي شي بس ضيفيِِ يطلع من عندي راضي وانا اقول يا فضيحة اخوك يابو سعد لان الاخ في ذا الوقت ما راعى ظروفه ولا فكر ان اخوه على قده ولو هي ذبيحه ما عشته وخلى اخوه سيرته على كل الناس ما قال كثر خيره يكفي ما تردد وقال حياك يا اخوي وبعدين يا كثر ذبايحنا وعلوم المرجله ويا اكثر منها دينها على نهاية ها الشهر وكثر ما راح ينزل الهم بصاحبها خلكم واقعيين الناس تشتكي من غلا الاشياء البسيطه مثل الحليب والرز وتضرب كف على كف وانتو علوم الرجاجيل علومهم وقف مع اخوك يا اخوي ما ابي اضيق عليك يا اخوي محتاج ترى ما يردك الا لسانك فكر في وش بيحطله بتعبي بطنه ولا لا عايش تناقض ما ادري متى نطلع منه وبعدين صبة القهوة عاده اتعجب لها عمر الولد كم ولو فيه خير اخذ ولد اخوه على جنب وعلمه صبة القهوه وعلوم الرجال من جد الله يعينا على انفسنا بعد ها المرجله علوم التبذير اكرمناهم واخذنا ذنب ويا كثر الذبايح اللي ما المست وعارفين وين اتصرفت وغيرنا يدور اللقمه وتقولن علوم العلوم حب لاخيك داريه وقف معه روحله في ضيقه بصلتك له مو ذبيحه وفنجال قهوه

صدقتي والله كلامك عين العقل...
الواحد يكرم ضيفه ويحط له كل اللي عنده، بس يكون من الموجود عنده..
منورتني والله

حُلم
22-06-2010, 06:49 PM
مرااااااحب
رضـــــا الناس غاية لا تدرك
لو ابو سعد اعتذر من اخوة واجلة لوقت ماتتوفر معاة دراهم الذبيحة كان قال صرفني
وماعذرة لسوء ظروفة
وحطلة دجاج وماعجبة واكرمة بالقهوة وماعجبة صبة القهوة ولو هو قلبة على اخوة
كان اخذ ولد اخوةوعاتبة وشرح لة الوضع وكيف وعلمة علوووم الرجاجيل وصبة القهوة
وبني ادم ماخلقت متعلمة ولكن تتعلم!!!!!!!!
واذا كان على الدجاج عااادي الجود من الموجود وهو مو عريب هذا بيت اخوة
وكان سال اخوووة وقالة محتاج شي يمكن متسلف حق الدجاج
والمفروض عذرة لان هذا اخوة والتمس لة العذر ولو كان حط لة ذبيحة كان قال الطبخ سي
وليش التبذير والفشخرة الكذابة مد لحافك على قد رجليك ولا يكلف الله نفسا الا وسعها
وراي ان ابو سعد بيض اللة وجة وماقصر بس العين بصيرة واليد قصيرة
ويمكن راتبة مايكفي يجيب ذبيحة اذا كان من ذوي الدخل المحدود يجيب ذبيحة وطول الشهر يمد يدة
لفلان وعلان يتسلف مصروف بيتة وعيالة ويكون بنظر اخوة رجل ومقدرة
ماقصرت يابو سعد ولايهمك كلام الناس لان لايحذف بالحجر الا اعالي القمم




كلامك صحيح سعووفه، المفروض الاخ يقدر ظروف اخوه
والجار يقدر ظروف جاره، والصديق يقدر ظروف صديقه...
ومشكورة والله على ردك...

الراسيه
22-06-2010, 11:31 PM
بعض العادات مالها داعي ...بعدين مفروض هذا اخ مو غريب وانه اعلم بحال اخاه من اي شخص اخر.... دجاجه ...سمكه .... اي شي .. الجود من الموجوود

بس صب الفنجان هنا اقول قف !!!.. تعلم وامسك الدله زين وصب مثل الرجال..

>>>>وش عندها شيخ القبيله هههههههه

حُلم
23-06-2010, 01:41 AM
لووووول،
لا والله مو قف
احس مالها داعي، يعني اطبقها اوكيه
بس اذا غلط مالأحد حق يلومني
منورتني

نبضات قلب
23-06-2010, 02:54 AM
يا اخوان في ديننا الاسلامي تعاليم ساميه واخلاقيات نعمل بها وكما قال الرسول صلى الله عليه وسلم ( إنما بعثت لاتمم مكارم الاخلاق ) والعادات والتقاليد التي فيها صفات حسنه وتخدم الناس نتمسك بها المسأله مو تقليد وبس وهنا نحن نتكلم عن التفكير فأنا اعلم ان طلاقه الوجه وحسن الاستقبال اهم من بعير على صحن له عراوي ونفس شينه من صاحب المكان فالانسان اهم شي عنده كرامته ومكانته

النقطه الاهم ان الناس تراعي بعضها البعض فأنا لم اجد شخصا يزور شخص على قد حاله زعل او غضب لانه لم يذبح له ذبيحه بل اننا نأبى على صاحب المكان ان يذبح لنا لاننا اعلم بظروفه ونصر ان نأكل من طعامه والجود من الموجود لان العبره في حسن المعامله والحب المتبادل بين الطرفين

بالنسبه لفنجان القهوه انتم مكبرين القصه يا اخواني العبره ان فيه شخص واقف قبال الضيف وماسك الدله اذا عبى الفنجان بالكامل راح يطول بالوقفه وتعرفون ان هناك ضيوف اخرون يصب لهم القهوه لذلك هذا المقدار للكيف ليكون بإمكانه المضيف صب القهوه للجميع عند انتهاء كل شخص من الفنجان الاول والقهوه العربيه حلاوتها في قلتها وليس بكثرتها لان كثرتها مضره جدا

عموما انا ضد تعنيف الاطفال عندما يخطئون بل انا مع التوجيه الصحيح والكلمه الطيبه يقول الله سبحانه وتعالى ( فبما رحمه من الله لنت لهم ولو كنت فظا غليظ القلب لانفضوا من حولك ) وقال كذلك ( وادعوا الى سبيل ربك بالحكمه والموعظه الحسنه )

كل مكان له ادابه وواجباته

للاسف ان بعض الناس تستمتع بأكل لحوم الاخرين وليس في مجلسهم الى لحوم الناس ليتناولوها ويصرون على واجباتهم ولو كانوا اردى خلق الله

اذا كنا نتكلم عن العادات والتقاليد فهي وضعت لسبب وهي مراعاه الاخرين لبعضهم البعض وليس كما فهمه البعض الذين يأكلون معك على صحن واحد ثم يأكلون لحمك عن الاخرين

حُلم
24-06-2010, 01:07 AM
لبى قلبك علي،
كلامكــ، عين العقل والله،
مشكور ماراح ازيد على كلامك شي،،
الف الف عافية والله استمتعت بقراءة ردك

الشايبه
27-09-2010, 09:12 AM
جابها بوشهد ولاازيد

الشايبه
27-09-2010, 09:29 AM
ان طلاقه الوجه وحسن الاستقبال اهم من بعير على صحن له عراوي ونفس شينه من صاحب المكان فالانسان اهم شي عنده كرامته ومكانته


يأكلون معك على صحن واحد ثم يأكلون لحمك عن الاخرين

سلمت ولاهان راعي الموضوع