المساعد الشخصي الرقمي

مشاهدة النسخة كاملة : [you] رأيك يهمني


الخفوق
09-04-2010, 09:55 AM
صباحكم جوري




امس كنا بجمعه بنات وتناقشنا بموضوع وحبيت انقله لكم وأخذ أراكم فيه

وهو هل المهر يمثل قيمه البنت

راح أنقل لكم الآراء واتمنى الكل يشارك برايه

وهنا ما اتكللم عن غلاء المهور

أتكلم لما تسمع ان بنت فلان تزوجت 100000. وبنت علان تزوجت ب 10000

هل يجي ببالك ان هذي اهلها يقدرونها والعريس شاري النسب

والثانيه اهلها مرخصين بها ويبونها بس تعرس وتتوفق وكانها هم وانزاح

الخفوق
09-04-2010, 10:08 AM
هنا انقل لكم وجهات نظر البنات وارائهن
الراي الاول*

وانا ضده تماما

ان.. اساسا ماعاد به رجال هالايام

والطلاق صار بالهبل يعني قليل اللي تنجح في حياتها

والرجال اذا مادفع فيها وتعب علشان ياخذها مارح يحس بقيمتها

يعني حتى لو تطلقت لاسمح الله .. مو تكون راحت برخيص ورجعت برخيص

هنا الظلم والقهر انه يكون مادفع فيها شي وياخذها ويهينها وبعدين يطلقها


والراي الثاني*

وهو آلي اتفق أنا معه

*

البنت في النهايه ماتبي الا الرجال اللي يحترمها ويحبها , حتى لو كان ماعنده شي
و ما دفع مهر كبير


*

الخفوق
09-04-2010, 10:11 AM
هنا اترك لكم المايك

للتعبير عن آرائكم << متاثره ب tv

انفاس حره
09-04-2010, 10:24 AM
بصراحه راي في هالموضووع البنت مكانتهااا محفوظه بماانهاا بنت حسب ونسب

والمهر مهما زاد اونقص لا يؤثر ع مكانتهاااا في المجتمع

اهم شي الله يوفقهااا برجل صالح و حنون

يعطيك العافيه اختي الخفوق ع الموضوع الرائع

تحياتي لقلبك الطاهر

وجهة نظر
09-04-2010, 01:21 PM
والله أحياناً تتزوج البنت بــ 100000 وهذا المبلغ عند البعض القلة يعادل 10000 يعني المبلغ من وجهة نظره ولا شيئ ز لأن عنده ملايين . فما هو شرط أن البنت أهلها يطلبون مبلغ خيالي حتى ما تتطلق البنت بكل سهولة . أنا بالنسبة لي مستعد أخلي أختي تجلس بالبيت ولا يتزوجها واحد قليل أدب ومستهتر . أهم شيئ حسن الإختيار وعدم الإستعجال في مثل هذه الأمور . لأن الضحية في النهايه البنت ، وانا من الناس اللي مستعد أخطب لبنتي مستقبلاً ، ولكن بطريقة غير مباشرة ؟
مشكووووره عزيزتي الخفوق على الطرح المفيد

أبوشهد
09-04-2010, 01:58 PM
الخفوق

موضوع جميل

ومجاله خصب للنقاش

لي عودهـ

الراسيه
09-04-2010, 02:20 PM
اللي يعتبر البنت سلعه سواء اب او زوج وان قيمتها بفلوووس يعتبر غلطان

هو صحيح المهر الكثير ينفع بيني وبينكم ههههههه:15_9_17[1]:ه

ابو عبدالرحمن
09-04-2010, 02:38 PM
الاب يزوج بنته عشان يسترها ويرزقها الله برجال يضفهاوبذريه صالحه تبر فيها ماهوب عشان يشتري
ويبيع فيها المسأله زواج ماهيب تجاره

انا لوعندي بنت وتقدم لها عريس اهم شي عندي انه يكون رجل صالح ومن اصلآطيب والمهر اخر شي افكر فيه

هالحين ماشاء الله البيوت متروسه حريم الوحده تعنس مالقت رجال والسبب غلاء المهور يسرو ولاتعسرو



يسلموووووووووووو

الخفوق
09-04-2010, 04:38 PM
اختي رزن اتفق معك ان قيمه البنت مو بالمهر

بل بشخصيتها

بس هل كل الناس ينتظرون من وجه نظرنا أتمني هالشي

الخفوق
09-04-2010, 04:48 PM
اخي وجه نظر أنا حطيت المبلغ كمثال

فيه ناس يدفع بس قيمه فستان الزواج 100000 ويدفعها والناجد يضحك

أنا قصدت لما تسمع هالكلام إحساسك ان البنت تستأهل وان اهلها يحبونها

وان الي مهرها قليل تكون رخيصه بعين الي تزوجته

ولو عرضو عليك عروستين وهم مثل هنا بالسعوديه ( كنك بتشتري جحه ما تدري هي حمرا او لا)

بتقول لو البنت مو حلوه وتستاهل ما طلبو هالطلبات والا بتحس انه مبالغ فيها

والثانيه بتحس ان اهلها يبون الفكه منها وبس يبونها تعرس وخلاص والا بتفكر ان افضلهن أقلهن صداقَ
*

الخفوق
09-04-2010, 04:52 PM
هلا وغلا اخوي ابو شهد وبنتظار عودتك

الخفوق
09-04-2010, 04:54 PM
اتفق معك اختي الراسيه

ان قيمه البنت مو بمهرها

تسلمين يا الغلا على المرور

الخفوق
09-04-2010, 05:02 PM
هلا اخوي فتى المرقاب
كلامك صح ميه الميه

بس أنا هنا ابي اعرف ليه اغلب الناس يفكرون لما احد يزوج بنته بمهر قليل يقولون كنه يبي الفكه منها او تعب من كد عليها

ومن هالكلام الي يضيق الصدر مع ان لو ناقشته بالموضوع يقول على الاقل يجيها زي بنات عمها ليه يقلل من قيمتها ويرخصها

ولو انها لتأخذ اجنبي ( مو من نفس القبيله او فخذ ثاني طلب اشياء ما انزل الله بها من سلطان ويقولون لك احسن خل
يعرف قيمتها وان اهلها أغلو فيها

واول كلمه أسمعها إيه خل من الاول يعرف قيمتها

المشكله ان الي قاهرتني ان بعض البنات تربط حب اهلها ودلعها لهم بقيمه مهرها

وناسه
09-04-2010, 05:26 PM
شباب هالوقت مستهترين ومافي احساس بالمسؤولية يعني اذا ماتعب في تجميع المهر ماراح يحس بقيمة زوجته وممكن يطلقها او يتزوج عليها لانه بيحس ان الزواج مره ثانيه امر عادي

اللوووتس
09-04-2010, 05:39 PM
والله موضوعك روعه ياخفوقي وكلامك صحيح 100%
وأنا أتفق كمان مع رأي الراسيه
..

بوعبدالله
09-04-2010, 07:21 PM
اقول ويقلون وتختلف القوال @@ الزوجه مهيب سلعه في السواق
لودفع فيها مال وزود المال @@ متستوي الخلاق مع .....البـواق

الصارم
09-04-2010, 07:37 PM
مشكور الخفوق
اختي انا اشوف والله كثرة المهر اوقلته ليس له علاقه بطلاق
واكثر الرجال اذا جاه شخص يشوفه كفو انه يناسبه مايطلب شي
ويقول اريال وحشمة الرجال وهذا لايعني انه يبي الفكه من بنته
بلعكس هو شاف ان هذا الشخص انسبه بيشرفه ونه بيعز بنته
وشخص ابن الحمله يعرف انه قدره ولم يطلب عليه شي وترك الحريه له
في المهر هو الي يحدده هذا رايح يحافظ على بنته اكثر
واي شخص يشوفه رخص بنته وزجها له ولم يطلب مهر هذا قليل اصل والافظل ماتجلس عنده
وكثرة الطلاق الحادثه هي من سو التفاهم بين الزوجين او عدم احترامهم لبعضهم
ولا خفي عليكم ان بنات هذا الزمن فيهن اعناد ودلع زايد ولا تعرف كيف تحافظ على بيتها وزوجها
وي كلمه يقولها زوجها قالت طلقني
اذا كل نقاش يدور بين الزوجين بتقول طلقني اكيد بيمل من هذه الكلمه وبيطلقها
انقاش اذا حدث بين الزوجين وحتما اكيد بيصير مشكله
و الرجل العاقل يخرج من البيت حتى تهدى النفوس وبعدين يكمل نقاشه بهدو مع زوجته
اشكرك على طرح هذا الموضوع القيم

غاْرديّـכּہاا
09-04-2010, 08:31 PM
أشكركٍ اختي على موضوعك
انا لا اعتقد بأن المهر يحدد قيمه المرأه
الموضوع حسب امكانيات المعرس
فكثير من الفتيات يستحقن الكثير
على الأدب والأخلاق والجمال
وتكون مهورهن بسيطه
وحياتهم سعيده
واخريات لا يستحقن ومهورهن قيمه
ولكن حياتهم سيئه
للغايه
لكن يبقئ الاول والاخير احترام
الاحترام والحب
بينهم...$

ليس المهر هو ما يحدد قيمه المرأه أبدا
وقد قال الرسول صلى الله عليه وسلم
(أقلهن مهورا أكثرهن بركة)


اشكرك على الموضوع
وتقبلي مروري

حلوانيات
09-04-2010, 08:48 PM
وجهة نظري

عمر ما كان المهر قياس لمكانة المرآة وصدق رسولنا الكريم صلى الله عليه وسلم

للحديث في الصحيحين أن رسول الله صلى الله عليه وسلم قال للذي خطب الواهبة نفسها " اطلب ولو خاتما من حديد " قال : ولو كان فيه كراهة لم يأذن فيه به ، وفي سنن أبي داود بإسناد جيد عن معيقيب الصحابي رضي الله عنه - وكان على خاتم النبي صلى الله عليه وسلم - قال : " كان خاتم النبي صلى الله عليه وسلم من حديد ملوي عليه فضة " .

أشكرك الخفوق على هذا الموضوع القيم

ارجوانه
09-04-2010, 10:08 PM
طرح رائع الخفوووق ومميز ..
المراءة جوهرة لا تقدر بثمن وكنوز الدنيا ما توفيها قدرها ..
لك مني كل التقدير والاحتراام

ولـ العنود ـه
09-04-2010, 11:51 PM
المهر القليل ما يدل على مكانه المرأة

و لا يدل بعد على انها قاصره او فيها اي عيب او ان اهلها يبون يتخلصون منها بأي طريقه

هناك اناس يقيسون قلة المهر في نقص الزوجه
لان نظرتهم ماديه0يعني فيه رجال اذا ماتعب على الزوجه يزهد بها
بينما هناك ازواج0يرى فيها انسانه جوهريه ويقدرها ويرى فيها كل معاني
الجوهر الجميل0وهناك ازواج يستغل الزوجه ويحاول ان يعوض ماله
منها باي طريقه0فهو غير راغب بها0ولكنه يتذكر ماله كلما راها
فيظلمها ليسترده منها000
في النهايه الوسط هو المقياس لاغلاء فاحش ولا رخص شديد المهم شي
يدل على قيمتها المعنويه كاأنسانه


المهر هو كرمز تقديري للزوجة فقط لا غير .. لا تدل كثرة المهر من قلته على مكانة الزوجة في قلب زوجها .. بالعكس المفروض الزوج يقدر الزوجة التي يكون مهرها أقل لأنها قبلت به بأقل مهر


ويكفينا حديث رسول الله صلى الله عليه وسلم " ايسرهن مهرا أكثرهن بركة "

من الصحابة من تزوج بشئ من القرآن يحفظه .. ومنهم من تزوج بخاتم من فضة


اشكرك اختي على هذا الطرح الرائع
يعطيك العافية

عسل .~
10-04-2010, 12:51 AM
شباب هالوقت مستهترين ومافي احساس بالمسؤولية يعني اذا ماتعب في تجميع المهر ماراح يحس بقيمة زوجته وممكن يطلقها او يتزوج عليها لانه بيحس ان الزواج مره ثانيه امر عادي



أنا معك الصراحه كلامك وربي صح ..


اذا ما تعب بالمهر ماراح يحس بقيمتي ويسير عنده عادي يتزوج مرا ثانيه ..

الخفوق
10-04-2010, 01:28 AM
كومارو

ررووج

المها

حلوانيات

ارجوانه

وله العنود

أستاذنا بو عبدالله

اتفق معكم

لاعدمتكم

الخفوق
10-04-2010, 01:46 AM
اختي وناسه

حبيبه قلبي عسل يا عسل المنتدى

الرجال لو بيتزوج مو عايقه المهر

بمدرسه اختي الحارس عنده 11 طفل ومعدم يوم بغى يتزوج ما عاق معه فلوس ومهر

وولد خالتي دفع مبلغ خيالي مهر وشيكه بذيك الحكيه وحفله واااااااو وجلس شهر وطلقها

المهر ما اعتقد هو الي يبين قيمه البنت

وما زال النقاش مفتوح

واختلاف الراي لايفسد للود قضيه

BiG-head
10-04-2010, 02:05 AM
بسم الله
بما انو الموضوع يستاهل النقاش وانتي / انت سالتي راح اقول رايي

اول حاجه الشي هذا يعود لاهل البنت يعني انشاء الله لو كان المهر ريال واحد بس

وبعدين يعود للرجال نفسه اذا انو البنت ناسبته وووو الخ انشاء الله انهم راح يتوفقو

لكن في الاخير انا اشوف انو كلام الرسول عليه الصلاه والسلام افضل من اننا نكبر ونصغر في الموضوع

اللي هوا للرجل (من استطاع منكم الباءه فليتزوج)

وايضا عندما قال الحديث الذي ذكر (تنكح المراه لاربع .....

وفي حديث بس ماني مفتكرو

لكن بما معناه انو اذا احد بيتزوج من بناتكم وترضون خلقه ودينه زوجوه


خلاصه الكلام انو الرجال لمن يجي بيتزوج ترا مابيشتري البنت انشاء لو مهرها اش ماكان

وفي نفس الوقت اهل البنت مو يحسسو انو جاي يشتريها زي بعض الناس

حاس اني كثرت كلام:graaam (114): بس يلا سامحونا على الاطاله

shiraz
10-04-2010, 02:20 AM
مرحباااااااا

موضوع حلو ... وانا راي انه الرجال مايعيبه الا جيبه ... على قولت اهل اول
وهم صادقين في هالمقوله ... احيانن اهل البنت ما يطلبون مهر بس يشترون رجال وزي ماهم يشترون رجال حلات الرجال يشتري بعد الحرمه الي بياخذها ويكرمها ... مو معنا كلامي انه شرط اساسي انه يكون المهر مرتفع ...
ولاكن يكون المهر المعتاد عليه .. ويقوم بالازم من جميع النواحي علشان مايجيه العيب ... احيانن الرجال لما يحس انه ما قدر على مصاريف الزواج من جميع الجهات تلقينه من ابسط مشكله بينه وبين زوجته على طول يجي في باله انه مو مالي عين زوجته لانه ما كان قايم بامور الزواج على اكمل وجه ..
يعني هذا سبب ..

اتمنى اكون افدتكم بالي عندي

لكم مني خالص تحياتي

عــــشــــق الــحــكــمــاء
10-04-2010, 02:53 AM
السلام عليكم

اشكرك اختي ...الخفوق ...عالموضوع المميز واللي شاغل تفكير الشباب وانا منهم والشابات
اسمحيلي ان ابدي رأيي

فكلنا يعلم مدى معاناة الشباب حين يقدم على الزواج ليصطدم بأول المشوار بحاجز غلاء

المهور فكم من بيت نجد فيه شاب تجاوز الثلاثين من العمر ولم يتزوج وكذا الحال

بالنسبة للفتيات فالمشكلة مشتركة بالعنوسة بين الطرفين وينتج عن تأخير الزواج

الوقوع في الحرام والزنا والعياذ بالله ولو عملنا دراسة لوجدنا بأن النسبة عكسية فكلما

زاد عدد المتزوجين قلت جرائم الاختلاط والزنا والعكس صحيح وأوجز ذلك في هذه

النقاط حتى يسهل الفهم:

# كثير من أولياء أمور الطالبات يبالغ في مهر بنته وخصوصاً إذا كانت معلمة طمعاً في

راتبها وطمعاً في جزء كبير من المهر.


# غلاء المهور هو أكبر العقبات في طريق الزواج أمام الشاب .

# سبب غلاء المهور عنوسة كبيرة لكل من الشباب والفتيات فامتلئت البيوت بمن جاوز

الثلاثين من العمر ولم يتزوج .
.
# غلاء المهور سبب غير مباشر في الوقوع في الحرام والزنا والعياذ بالله الناتج عن

الامتناع عن الزواج .

# بالغ الناس كثيراً في تحديد المهور فمنهم من يحدد مبغ 100 ألف أو 80 ألف

وغيرهما وهذا هم كبير جدا على العريس كله هذا ناتج عن الطمع.

# أرى بأن المهر المناسب هو بين 20-40 ألف ريال فهذا هو في حدود المعقول

ومناسب لكل الطبقات .

# نسمع في الصحف ما يثلج الصدر من قبل بعض أولياء الأمور الذين ضربوا أروع .

المثال و الخصال الكريمة بتحديد المهر لابنته بريال واحد فقط تشجيعاً على الزواج

وعبرة للغير.

# أين نحن من زمن السلف الصالح فمنهم من كان يزوج ابنته مقابل حفظ الزوج للقرآن

الكريم كاملاً فقط .

# بسبب غلاء المهور أصبح الاقبال على الزواج من خارج المملكة كبيراً جدا وخصوصاً

من سوريا واليمن ومصر والأردن فبـــــ 25 ألف ريال تتزوج البنت مع المهر وتكاليف

الزواج الخ.


ومضة :::

""ايتها الزوجة والمقبلة على الزواج انتي الأم الثانية لزوجك""

اتمنى اني بينت وجهة نظري


تقبلي تحياتي

عسل .~
10-04-2010, 03:12 AM
أخوي ::. عشق الحكماء .::


حبيت أعلق ع نقطه ذكرتها انت اللى هي ..


# أرى بأن المهر المناسب هو بين 20-40 ألف ريال


يعني أنت لو تقعد اشوي وتفكر فيها تلقى انو 20 الف وش بتقضى من حاجات المرا ؟؟


يعني الواحد يفكر بعد بأحتياجت المرأه عند الزواج


يعني انا من نظري انو أقل شي هو 70 الف ..

أبوشهد
10-04-2010, 11:34 AM
ماشاءالله

الموضوع اشبع بالنقاشات ماشاءالله

الخفوق
10-04-2010, 05:28 PM
Shiraz

big-head

عشق الحكماء

شاكر مروركم وارائكم الي أثرت الموضوع

عسل اشكر مداخلتك مره ثانيه

ابو شهد ما سمعنا رأيك

هــــــــــــذا أنا
11-04-2010, 12:59 PM
المهر هذا همنا والنهايه دفع اقساط وقروض بعد الزواج وماندري تستمر الحياة ولا لا
ناخذ مهر ونسوي عرس بس بالمعقول واحنا الحين نشوف كيف هذه الامور تزول بعد الزواج وما يبقى الا الاحترام والود والعشره غير كذا في نقطه للأسف تحصل من المبالغة في المهر والعرس ما يمدي الوحدة تدخل الا طايحه منصرعه وبعدين نكتشف العين جتها ولا مسحوره ويكون اغلب الحل الطلاق وشفت هذا الشي بعيني محد قالي الزواج عبرته بعد المهر والحفل عبرته في دوامه بالحب والعشره والأحترام والمشاركه صدقوني هذا اللي يدوم حاربي الدنيا عشان في النهايه تلقين أجمل المشاعر والأحاسيس والحنان محيط بيت الزوجيه
مشكوره اختي تقبلي مروري

الوافية
11-04-2010, 05:18 PM
السلام عليكم
معليش ما شفت الموضوع الا الحين بحكم انشغالي هاليومين
اسفه
الموضوع ذو شجون
صراحه المهر مو كل شي
اهم شي ان الله يوفقهم
ويستر عليهم
بعدين بالنسبه للمهر اتوقع انه بين 40الى 50 مناسب
مع انه في اغلب الاحيان ما يكفي شي
بس البنت الفطنه تقدر تزن الامور والضروريات اهم شي تبدا فيها
والله عارف بنات مهرهم 50 الف كفاهم والباقي حطوه في البنك
وحاشمه نفسها قدام زوجه
عسى الله يصلح الحال

حنين الشوق
11-04-2010, 06:04 PM
عمر المهر مايدل على قيمة البنت عند أهلها

والأهل دائما يسعون إلى تزويج أبنتهم أحسن زيجة

بس بصراحة المهر لازم يكون مناسب وأقل من خمسين ألف في وقتنا مايسوي شيء

نبضات قلب
11-04-2010, 11:43 PM
موضوع الزواج قبل المهر يا اعضاء هل نملك الاختيار ام هي ورقه يا نصيب يا تصيب يا تخيب

سبب غلاء المهور هو النساء للاسف للتباهي والتفاخر بأشياء واهيه تتلاشى عند بزوغ شمس اليوم التالي لليله الزفاف ثم يقوم العريس بدفع ثمنها غاليا بعد الزواج وتكون الزوجه هي الضحيه والسبب الرئيسي لمعاناته التي كلما رآها تذكر ما فعله اهلها فيه من طلبات تعسفيه

البنت سوف تعيش مع هذا الرجل باقي حياتها لذلك لنجعلها في ايدي امينه يهمنا ان يكون المتقدم للزواج رجل ذو خلق ودين وابن ناس ويستطيع الانفاق على زوجته بالنسبه للمهر اعقتد ان ما يكفي لتجهيز المرأه هو المهم ودعونا من الكماليات لان السعاده ليست في اشياء جامده توضع في صاله الزفاف محاوله يائسه لكسب رضا الناس التي لا يهمها سوا الكلام الفارغ حسدا من عند انفسهم بعد ان تملأ بطونها من الطعام ثم تنشر غسيل اهل الحفل والحاضرين فلا تحاولوا كسب رضا من لا يرضى وافرحوا بهذه الليله مع من تحبون لان السعاده الحقيقيه تبدأ بعد الزواج

الله يزوج الجميع ان شاء الله قولوا آمين

عناد البقمي
12-04-2010, 08:35 AM
عمر المهر ما كان مقياس لقيمة البنت

لان وش بتستفيد البنت او اهلها من قيمة المهر

الغالي طيب لو فرضنا انه دفع لها مهر 100000

وبعد شهر او شهرين طلقها وش بتستفيد البنت واهلها

من المهر ما راح يستفيدون الا لقب بنتهم مطلقه !!!!

بالعكس الحين تفتحت عقول الناس وما عاد نشوف المهر

الغالي بالعكس اكثر القبايل الحين خفضوا من قيمة المهر

وصار احلى حد ما يتعدى 50000 الف وهالشي حلو

وخلى اكثر الشباب يقبلون للزواج ..........

خان العسل
15-04-2010, 12:27 AM
يجب على أولياء البنات أن يختاروا لبناتهم الرجل الكفء من غير أن ينظروا إلى ثروته. فإن النبي صلى الله عليه وسلم قال:
إذا جاءكم من ترضون دينه وأمانته فزوجوه. إلا تفعلوا تكن فتنة في الأرض وفساد كبير. صدق الرسول الكريم عليه أفضل الصلاة وأتم التسليم
وفى الحديث يدل على أن الرجل إذا عرف بالأمانة والتقى, فعلى الولي أن يزوجه ابنته ولو بأقل شيء. وفي الحديث : خير النساء أيسرهن مهورًا

عااايشه وبس
17-04-2010, 11:13 AM
صبحكم الله بالخير جميعا ... اللهم صلي وسلم على سيدنا وحبيبنا محمد

اشكرك اختي على هالموضوع ..

انا من رايي ان المهر ما يحدد قيمة المرأه .. لكن لو هي جات بالسهل بترووووح بالسهل ..يعني لو اللي بيتزوج تعب وجاب مهر والله صعب يتخلى ..

فيه واحد زوج بنته بريااااال ولما صارت في بيت زوجها صار يناديها (تعالي يا علبة الببسي)

فأنا من رأيي لا إفرااااط ولا تفريط ..لا ريااااال ولا مية الف..خير الأمور الوسط.

باااااارك الله فيك عالطرح الجميل ..

سبحان الله وبحمده سبحان الله العظيم ..

وهف
22-04-2010, 11:22 PM
في شنو تبين راي وهف

وهف
22-04-2010, 11:49 PM
المهر مايحدد شي في البنت لكن يمكن يضيع نصيبهاا وبعدين في الاول والاخير الانسان هاذا راح يكون زوجها والمصلحه وحده

دلع الشرقيه
23-04-2010, 12:08 AM
لا المهـــــــر مو شرط يكون كثيــر اذا كآآنـو يحبون بعض قبل الزواج

وكتــب اللـه بينهم نصيب ماتوقع بيختلفون على المهر وانا من وجه نظري

اهم شي بالرجال اخلآآآقه ودينــه ومو شرط يكون التوفيق بالمهر آآلغــآالي


ويسلمووو حبيبـتي الخفووووق عالموضــــــــــــوع } ..ْْ

وهف
23-04-2010, 12:32 AM
عندي مشكله لكن مستحي اطرحهااااا

وهف
23-04-2010, 01:48 AM
اللي يغلي المهر اكيد زوج بنته عشان الفلوس لكن لو فكر ان هاذا الرجل راح يكون زوج بنته ومصلحتهم وحده ليه يضيق عليه

الوردة الخجولة
29-04-2010, 03:44 AM
اولا السلام عليكم ورحمة الله وبركاته

قبل ماادخل في نقاشي بصراحة تفاجئت لمن لقيت اسمي الوردة الخجولة رايك يهمني ففزعت وقلت الله يجعله خيرمن اللي يبي رايي والى الان لم ادخل الموضوع >>>>> قلت اكيد معروفة ههههه <<<<<<لاعن جد قلت لازم ادخل واشوف الخبر ............

اولا اسعد الله صباحك وصباحكن جميعا بكل خيرومحبة ورضا من الرحمان ،،

ثانيا الحديث عن المهوراوغلاءالمهور وعن صداق الفتاة اوالمهرحديث يطول ولواننا سنوجزه في سطراوسطرين ولكن سوف يكون لي عودة للموضوع والمشاركة بشكل واسع وان شاءالله اكون ضيفة خفيفة في نقاشي هنا .....


مع امتناني وشكري ومودتي لك الخفوق على الطرح الهادف واللي يمس الواقع

حنين الوجد
01-05-2010, 03:09 AM
السلام عليكم قيمة المهر او كثرة ليس ضروري فانه لايزيد قيمة الفتاه المهم ان يكون الرجل صالح يتقي الله

عنابي
05-05-2010, 02:54 AM
سلام عليكم
كيف الحال
انا مدري الموضوع يقصدني او لا

بنسبه لزوجكم يا البنات ومهوركم الغاليه
ليه ابي اعرف اليه مهرة الوحده مثلا 100.000 ريال سعودي:035:

هو يعني سعرها غالي ان كان المهر يحكم سعر البنت عند اهله يعني ذلك ان البنت رخيصه
وهو ان اهله ينظرون للفلوس وتفكريهم مو الستر والعافيه للبنت :كش
بس فلووووووووووس:كش:angry:
واهم شي البركه للى تجمع الزوجين مو الفلوس:10_out_of_10::graaam (194):
يعني البنت تزوجتني علشان فلوس ومهره سلامااااات:AR15firing::cnf:
يعني الرجال يكرف عمره الين يصير عمره 35 سنه وعقبها يفكر بزواج علشان اجمع مهر العندليس نورة

تعبت اشتا ا ق
26-07-2011, 03:48 AM
سلام والله انا اقول مو شرط المهر انا زوجي لي ماشا الله 30 سنه ماتهوشنى ولا مرا والمهر 50 الف بس يعني مو شرط الرجال ماشاء الله معيشني بفله ومسدد كل ديونه اللحمد الله انا ضد مبدء انو البنت ماتتزوج عشان المهر بس هاذا حق من حقوقها المهر بس انا ما اتوقع انو يدفع 10000 بس لها المهم طولت عليك والله يعيشكم بسلامه ايه نسيت اقلكم انا بنت خالتي تزوجت ومهرها 40 الف وبعدين رجلها شك فيها وطلقها وطلب منها الفلوس وهما ما عندهم مبلغ واتفق ع 30 مع شيخ وبعد ما راح الشيخ طلب منهم 40 :021: صح

نووْور~
26-07-2011, 03:53 AM
سلام والله انا اقول مو شرط المهر انا زوجي لي ماشا الله 30 سنه ماتهوشنى ولا مرا والمهر 50 الف بس يعني مو شرط الرجال ماشاء الله معيشني بفله ومسدد كل ديونه اللحمد الله انا ضد مبدء انو البنت ماتتزوج عشان المهر بس هاذا حق من حقوقها المهر بس انا ما اتوقع انو يدفع 10000 بس لها المهم طولت عليك والله يعيشكم بسلامه ايه نسيت اقلكم انا بنت خالتي تزوجت ومهرها 40 الف وبعدين رجلها شك فيها وطلقها وطلب منها الفلوس وهما ما عندهم مبلغ واتفق ع 30 مع شيخ وبعد ما راح الشيخ طلب منهم 40 :021: صح


ماعلي من المهور علي من الرجال الوارد ذكره اخر السالفه :-

اذا اكرمت الئيم تمرد !!! ماياخذ مهره من المرأه بغير وجه حق الا اسقط الرجال وانذلهم

اصلاً الحر مايقبل ياخذ من مره ريال واحد من مهرها لوهي دم ضروسه

زمان والله ماعاد ينلقى فيه الرجال !!!

لهفة الخاطر
26-07-2011, 08:17 AM
|"الخفوق "
موضوع رائع وشائع النقاش فيه
~~~~~~~~~~~~~~~~
انا بالنسبة لرائيي ، وانا لست ضد او مع
انا بالنسبة لوجهة نظري: سكن الزوجين في بيت مستقل بهما اهم من المهر سواء قل او كثر
وبالنسبة للمهر " الوسط" لا يغلى ولا يقل
يعني خمسين الف بوجهة نظري يفي بالغرض + بيت مستقل
انا اتكلمت عن وجهة نظري .

تقبلي مروري ،،،،

sally
26-07-2011, 02:53 PM
بالنسبه لرائي


المهر لايمثل قيمة البنت


ولايعني كلامي انه تقبل تاخذ 10000


بل تاخذ المناسب لها ومايكفيها ويكون الزوج قادر عليه

واذا كان غني يقدر يدفع ميه ولا اكثر لامانع

يعني على حسب طبقة يكون المهر


وانا ارى المناسب سبعين الف

يسلموووووو اختي الخفوق

عنابي
26-07-2011, 09:28 PM
موضووووووووعك حلو
بس بنسبة للمهر عالي ولا على قولت الناس رخيص
لا يعني قيمة البنت لانه ليست سلعه للبيع او لتقبيل
الانسان العاقل هو الذي يبحث بستر لبنته وليس بأن يتبها بمبلغ المهر
العريس من اين جاب الفلوس أكيد قرض من البنك و دين وسلف
انا ابحث بالستر والشي المعقول وليس جنووووووووووووووووووووووووووووووووووووووووووووون
ثاني شي المهر ليس للاب او للاخ او للام
المهر يخص البنت المتزوجه (( العروووووس))
وسبب ارتفاع المهوووور سبب البنات كثير بالبيوت عوانس والشباب لا يستطيع على التكاليف

اانا معك عند القبايل الجزيرة امور غير متفق فيه من ناحيت المهووور الا القليل
الحمدلله عندنا في قبيلتي المهر لا يتجاوز 10000 ريال سعودي
يعني لو فكرة في الزواج راح يكلفني الزواج ما يقارب 130 الف ريال
10 الف مهر
5 الف ملكة وشبكة
20 الف كسوه للعروس
60 الف ذهب
10 الف تكاليف العشاء
20 الاستراحه ع الاقل


الله يبارك للجميع

بويسلم
26-07-2011, 09:43 PM
قال صلى الله عليه وسلم ((خير النساء أيسرهن مهورًا))
وصدقوني كثر المهر او قله ما يعني قيمة البنت
اللي يبي يرتاح في زواجتة ويكون اختياره ممتاز
عليه يحاول انه يظفر بذات الدين لانه صدقوني اذا كانت نيتك
تظفر بذات الدين حصلت الجمال والحسب والنسب والمال
ولكم خالص الشكر

اخصائية المستقبل
26-07-2011, 11:15 PM
بسم الله الرحمن الرحيم في الحقيقة موضوع جيد ويسرني ان أشارككم راي أولا :



قول الرسول فيما معناه (التمسو ولو خاتما من حديد)
غلاء المهر لا يدل على قيمتها بل العكس
على كل حال يجب ان يحدد المهر حسب امكانيات الزوج سمعت قصه حدثت

حيث ان شابا اغرم بفتاة ولما تقدم لخطبتها طلب منه والدها مهر خيالي المسكين كان على قد حاله لكنه فعل المستحيل ليجمع المبلغ لانه يحبها بالفعل

في الاخير تزوج بها ....
وفي يوم من الايام تاخرت البنت ولم تزر اهلها فذهب والدها لزيارتها واذا بالزوج يستقبله امام الباب

الزوج.. ماالذي اتى بك
الاب ..اتيت لزيارة ابنتي فقد اشتقت لها
الزوج.. تكرم عينك لكن لترى ابنتك عليك ان تدفع كذا وكذا (نفس مبلغ المهر)

واصر الزوج على موقفه وكانت زوجته مشاركة في الخطة
في الاخير اضطر الاب للاستسلام
::)
رمضان كريم

غنج نجد
28-07-2011, 02:31 AM
صرااااااااااااااحه المهر ليس مقياااس ابدااا ..احنااا عندنا الفتااه ...مهرهاا 50..والمطلق والثيب ..40 او 30 ..يعني ...شي يسااعد الفتااه ..فقط لااستعدااد ...للحيااه الزوجيه ..وع فكره احناا اخوااني وابوي الله يرحمه ينزل من المهر ويهدوناا من جيوبهم الخااصه الي ماايتعداا ...المهر ..لانهم يشترون رجال مو يبيعون بنتهم ...بالعكس ....

واناا صراااحه اجد ان الاخلاااااااااااااااااق والمحاافظه ع الصلاااااااه ....وقيمه الشخص يبن اهله بحد ذااته مهر ....

موضوعك راااااااااااااقني جدااااااااااااااا....وفعلاااااااااااااا ...للاسف يااكثر ماانسمع ....وللاسف هذاا مو قيمه للفتااه ابداا ....

عااااااااااااااافااك يااقمر .....

الوجد
03-08-2011, 01:42 AM
موضوع رائع والمناقشة فيه تعطي ثمارا....ولكن البعض يسيئ الفهم

ومما سمعت من قصص بهذا الخصوص ما يرويه لنا الشيخ سليمان الجبيلان وهو الموقف السلبي الذي نهجه الزوج ................يقول الشيخ :
كان هناك شاب طلب من والده أن يذهب معه لطلب يد بنت أحد الأسر الثرية كما كان الولد لا ينقصه شيئا بل به جميع المواصفات التي تحلم بها كل فتاة
وعندما تم الزواج وإقامه الأحتفال بهما كان قد كتب أب البنت في العقد أن قيمة الصداق ريال واحد لأنه معجب بالولد وأخلاقه وعائلته
وبعد تمام أحتفال الزواج سافر الزوجين لقضاء شهر العسل في أحدى الدول
وكان الزوج إذا أراد أن ينادي زوجته كان يقول لها وينك ياعلبة الببسي !!!!لأن علبة الببسي بريال
وعندم أكثر من مناداتها بعلبة البيبسي حزنت وعندما رجعوا ذهبت لأهلها مع أنهما كانا يحبان بعض ورفضت الرجوع له وأخبرت والدها

وعندما حضر الزوج ليرد زوجته رفض الأب إلا بمليون ريال
فما كان من الزوج المحب لزوجته تقديم ماطلبه الأب
فكان إذا أراد أن يناديها يقول تعالي يامصنع الببسي!!!!

FRoOoHa
03-08-2011, 05:06 AM
يعطيك العافيه اختي ع الطرح..

بالنسبه لي المهر ماايمثل قيمه البنت..

اهم شي يكوون الزوج محترم ومتمسك في دينه..

وانه يسعدهاا في حياتهاا...

بس النااس وارائهم..؟ وش يفكناا منهم..

ماقوول غير ان كلناا فقرااء والله هو الغنــــي..

تحياتي لكـ..

عسل .~
03-08-2011, 05:26 AM
أنا أشوف اللى يرفع المهر هذا يبي الرجال يبعد ومايناسبه

أنا عن اللى حولنا اتكلم يعني مثلا انا من قبيله اذا جا احد غير القبيله اللى انا منها أغلب اللى اعرفهم يرفعون المهر عليهم اللى فهمته من هذا انو عشان مايأخذون منا ..

يعني هي تجيك على حسب التفكير مو شرط انو هذا يقدر بنته وهذا يبيها تعرس وبس لالا

هو حسب العادات هذا اللى انا اشوفه ..

ثأأنكس على هيك طرح ْ~

ولد القصيم
03-08-2011, 05:45 PM
السلام عليكم
مساء الخير على الجميع
ومبارك عليكم الشهر
لوزيادة المهر بتجيب نتيجه كان الناس ادفعو كل مالهم بس يلقون بنت الحلال الي تناسبهم
بس التوفيق بيد الله مب زيادت المهور اونقصه
وتقبلو مروري

دنيآ العجب
05-08-2011, 12:39 AM
هو صح يكون لها هيبة بالمهر الكثير

بس مايكون كثير لدرجة ارهاق كاهل الزوج وبالتالي إحساسه تجاها بأنها حمل ثقيل

خير الأمور الوسط

مهندس نواف
21-08-2011, 10:14 AM
قال النبي (صلى الله عليه وآله وسلّم): (اللهم أهذب ملك غسان، وضع مهور كندة. وقال: (أعظم النساء بركة أحسنهن وجوهاً وأرخصهن مهراً)

للأسف اليوم أرتفاع المهور شيئ يراه البعض قيمة للمرأة أي كلما كان مهر المرأة مرتفع أرتفع شأنها
والبعض يقول كل شئ أصبح غالي فلابد من رفع المهر لتتمكن المرأة من تجهيز نفسها وشراء كل شئ تريده
ولكن أفضل النساء أقلهن مهرا هذا ماقاله النبي عليه السلام

الصراحة هذه مشكلة كبيرة يواجهها الشباب في أيامنا هذه وحلها يبدأ من البيت....أقصد من الأهل حيث أن الأهل يستطيعون أن يثنوا البنت على طلب المهر العالي ولكن المصيبة تكون حينما يشجعونها ويتوقعون الرجل قادرا على كل مطالبهم..

المسألة يحتاجلها حزم(من الأهل) وتكبير عقل (من البنت), بعض البنات جزاهم الله خيرا يرضون بالمهور المباركة القليلة لكن الأهل يصرون على تضخيم الأمور..من واقع تجربة الولد سيظل يشكر البنت على مطالبها القليلة في مسألة المهر للعمر كله ومن ناحية أخرى الرجل سيظل يحمل في قلبه(سلباً) إن تسبب المهر الكبير في مصاعب للحياة في المستقبل

أنا أعتقد إن التربية الصحيحة والإيمان الصحيح يستطيعان أن يساعدا في حل المشكلة...هذا مجرد رأي

ساهر حايل
22-08-2011, 10:10 AM
البنت ليست بقيمة مهرها بل العكس اذا رجعنا لكلام اشرف الخلق رسولنا الكريم كلما نقص مهرها اصبحت ابرك واكثر إحتراما وقدراً عن الرجل .. عدا اشباه الرجال واللي مايقدرون هالشي وان أهله ماطلبوا شي لأنهم شارين رجال ومايبغون يثقلون عليه ..



والله يزوووووووووج بناتنا ويسترهن مع من يطمحن اليه .. ومشوره صاحبة الطرح

شيهانه
23-08-2011, 03:46 AM
الخفوووق موضوعك قيم وجمييل جدآ النقااش حول هذي المواضيع وطرح أمثالها

انا عن نفسي اقوول لو اخذت مهر عاالي وش يضمن لها يكون الزوج مثل ماتبي وتتمنى كل بنت

يسعدها بمهر ويذلها بسوء تعامل "طبعآ مو الكل" لاكن اناا هذا اللي اشووفه وقد مرة علي في جماعتنا

ومو شرط يكون مهرها 5000 او 10000 علشاان تكون رخيصه وابوها هامه ستر بنته فقط

لاكن لابد من الرجل اللي بيتقدم يكون مقتدر ويحسب حساب لمثل هالامور والزواج ماهو بلعبه يوم او ليومين

الزواج عشررة عمر وماينقاس طبعآ بغلا المهر او تقليله

ويظل هذا قرار للبنت لاهو لوالدها او حتى لوالدتها اذا كانت البنت قنوعه ويهمها ان تعيش بسعاده وراحت بال راح يكون مهرها معقول ..

لكِ ودي وأحترااامي

ستديو سكون لتصوير النسائي
29-08-2011, 06:44 AM
بسم الله الرحمن الرحيم
وصلاة على محمد وال محمد وصحبه الاخيااااار
انا من رائي انو الزواج مو مهر ولا وضيفه ذو مرتبه عاليه لا الزواج اهم شي يكون الاحترام وعدم تدخل الاهل من كلا الطرفين وبكيذا نكون قدرا نحط الاساس وبعدين الشي المهم هم الاثنين يقدرون يكافحون ويطلعون بدل المية الف مليون الف

ابوتركي1
29-08-2011, 11:13 AM
خذ من بيت الفقير زوجه
وخذ من بيت الغني فرس؟!

ezzali
29-08-2011, 01:46 PM
لقد حدد الاسلام مقاييس الزواج والارتباط فى الحياة بطريقة سلسة ومتكافئة بحيث يكون الاختيار عن طريق ما حث عليه الرسول من قوله صلى الله عليه وسلم اذا جائكم من ترضون دينه وخلقه فزوجوه##وبالنسبة الى المراة فقد حث الرسول صلى الله عليه وسلم على ان تكون ذات حسب ونسب وجمال ودين وهذه هى المواصفات المطلوبة من الطرفين فغير ذلك يكون مخالف ويؤدى الى تفكك اسرى وتشتت وبالله التوفيق

:SnipeR (61):

maho0o
01-09-2011, 01:44 AM
خذ من بيت الفقير زوجه
وخذ من بيت الغني فرس؟!



سوري على التأخير بس صار لي قرون مادخلت المنتدى :z69: .. صآآآآدق والله .. أنا من رأيي أن المهر يكون كثير

ســــعود
04-09-2011, 01:23 PM
- انآ ابي افهم ســـعود وشدخله بالسآلفه ههههآآىى -
في نظري ليس بينهمآ فرق
هنآك من يشتري وهنآك من يشرآء , واعتقد بأن ليس للمهر اعتبآراًً للمستوآء , كم من زوج وزوجه هنئو وسعدو وتمتعو الحيآة الزوجيه الحقيقيه فعلاً التي تخفى على العديد من الازوآج وبمهر قليل .
شكري وتقديري لمجهودك .

جمييلهـ ▲
07-09-2011, 07:43 PM
خير الامور الوسط لا اسرااااااااااااااااااااااااااااااااااااف ولا تقصير


والمراءة نصف الرجل لا يمكن يكمل الا بها والمهر يحلل هذا العقد

وهف
11-10-2011, 08:56 PM
ليس المهر معيار لقيمه البنت لو فكرت انه معيار فقد اجعل وزنها ذهب لانها سوف تكون ام اولادي وعشيرتي طوال عمري من يحمل همي من اتقاسم معاها كل اموري فكيف اقدرها بمبلغ انا اخترتها فجعلت نفسي لها واقسمت لها ان نكون مع بعض طيله العمر ولن يفرقنا الا الموت لن ابلغ قيمتها لانها شريكه حياتي هل تعلمون كيف عباره عن اندماج روحين بجسد واحد كيف اوزنها بمبلغ مادي المبلغ هو بمثابه الهديه لقضاء امورها اعلم وانتم تعلمون لو لم اقدم شي راح تقول يكفي انك اقترنت بي واصبحت زوجي وانا كذلك افكر بالمستقبل معاها كيف ومتى اراء ابتسامتها واكون انا مصدر سعادتها هذا هو تقدير قيمتها ان تسعدها وهي كذلك كيف تريدونني اقدرها ليست قطعه ارض او محل انها روحي لاتقدر بثمن وجهه نظر اخوكم وهف الهاجري

طموحي بعيد
12-10-2011, 03:15 AM
طيب بسيطه نحل الموضوع
ساعدوا الزوج ب 10000 ريال
وخلوا المؤخر 100000 ريال
يصير البنت تتزوج بمئة وعشرة آلاف
وبالتالي ما تحس البنت ولا أهلها أنهم أقل من غيرهم!!

mnes
16-01-2012, 03:04 AM
إشكرك أختي الغاليه على الدعوة

لكن أنا أقول لا والله هذآ مايعني إن أهلها مرخصينها لا بالعكس والدين أساس حياتنا ومن شروط الزواج المهر ولو بالقليل

وعموما وقبل كل شيء التوفيق من الله راح تكون الحياة سعيده

نصيحه “والحياه الزوجيه هي عملية موازنه لا يجيدها إلا القليل ولكن أقول لابد من التنازلات من قبل الزوجين علشان تكون الحياه سعيده وقبل كل الشي الصبر.

أتمنى لجميع البنات والشباب حياة زوجيه سعيده

! ســيًــآســًة , رَجــٌـل !
26-01-2012, 11:05 AM
بصـــفتــي ايــش يهمــك رأيي؟؟

الـــبركــه فــــي الــــعـــوانـــس !!

عــنوانك يختلف عن مـــوضوعك,

ثقباوي
26-01-2012, 04:49 PM
السلام عليكم ورحمة الله وبركاته
مرحبا بك الخفوق

بخصوص الموضوع الاخوات والاخوان ماقصروا وضحو كذا نقطات مهمه بالنسبه للموضوع الراقي
لكن بما انك طلبتني ساكتب لك

طبعا الكل يعرف منا كل جيل جديد يختلف عن الاخر وللاسف الشديد عندنا هنا في المملكه العربيه السعوديه
مجتمع متناقض جدا الكل يريد وانا اريد وانت تريد وربك يفعل مايريد
والبعض الاخر للاسف الشديد لا يهتم بالقناعه والواقع وكانه يريد يخلق اشياء جديده في حياته
واختصر الزواج الان بصفه عامه كمهر وغيره .. الخ
اصبحت تجارة انا اكتب حقيقه وليس من خيال نعم تجارة .



تقبلو خالص تحياتي .

poor_man996
06-03-2012, 05:08 AM
بالنسبه لي اي شي يقارن بالمال ما يسوى... لان المال يجيب اللي تبغاه الااا!!! اشياء يستحي الريال يقرب منها ..ومن هذا المنطلق اعتبر اللي يقدر بالفلوس:44: ينشرا وينباع طول حياته :021:

وارجو تقبل رايي بعد طول غياب

طبيـعي جداً
06-03-2012, 10:20 AM
عني انا من اسمع ان مهر البنت وصل شي مُكلف..اقول في خاطري ( عز الله ماهم متوفقين )
ولما يكون مهرها متيسر وهين..على طول اتخيل ان ابوها رجال كفو وانها بنت ماتبي غير الحياة الجميلة البسيطة
والزواج اذا ماتيسر من بدايته..( فـ لنقرأ على روحه الفاتحه )
موضوعك قميل
لاهنتي..

TAREQ
06-03-2012, 07:13 PM
السلام عليكم

مساءكم عسل يارب



بالبدايه لو رجعنا الى اصل البنت فهي رمز لأمهاتنا وكل منا يعرف قيمة الام ومكانتها

فليس هناك مجال للإستهانه بالبنت او بالانثى ان صح التعبير

وللأسف هناك بعض الناس في مجتمعنا يقارن البنت ومكانتها بقيمة مهرها

فعندما يقارن بعض الرجال البنت التي مهرها 10000 بأنها ما تسوى او اخلاقها مو كويسه اكيد راح يكون غلطان

( اصلا بعض الرجال لو فكرنا نبيعه بالسوق ما يجيب 10 ريال للأسف ) عشان كذا مو منحقه يتكلم بالشيء هذا ويستهين بالبنت

صحيح فيه قليل من البنات الله يهدينا واياهم عندهم بعض السلبيات بس لما يكون الأمر بالزواج اتمنى من الناس اذا ما بيدعون لها بالتوفيق والرزق فلا يتكلمون في البنت

3bth
06-03-2012, 07:27 PM
عمر المهر مآ كآن يعبر عن قيمة البنت
بالعكس النآس الاكبآريه يزوجون بنآتهم بأسعآر تكآد تكون رمزيه
النآس تشتري الرجآل اللي ممكن يكون كفو لبنتهم ويقدر الحيآة الزوجيه والمذكور عنه كل خير
هذي وجهة نظري وأتمنى تقبلينهآ

TAREQ
06-03-2012, 07:32 PM
تذكّرت قصة واحد عندنا بالجنوب

كان يحب ولد جيرانهم ويحترمه لأخلاقه العاليه وكان يتمناه يكون زوج لبنتهـ

المهم انه تقدم الشاب هذا يطلب يد بنت الشايب اللي يقدره ويحترمه

من زود حب الشايب للشاب قال والله ما آخذ منك مهر لبنتي الا ريال واحد والبنت ما عندها مانع

تزوجوا ودارت الأيام وللأسف الرجل هذا كان يقول للبنت تري راس مالك ريال !!

البنت ما تحملت الشيء هذا وقالت لأبوها

ابوها دق على زوج بنته وقال لها ابيك تتعشى عندي الليله انت واهلك

جاء الشاب ومعاه اهله

الشايب ما قدم لهم لا قهوة ولا شاهي ولا شيء

قال لهم تفضلوا على عشاكم

دخلوا الصاله الا ويشوفون سفره طوييييييله وسطها علبة بيبسي

استغربوا الأهل وسألوا الشايب وش السالفه ؟

قال انا عطيتكم بنتي بريال وولدكم طلع ما يسوى ريال

هذا الريال ورجعناهـ لكم في علبة بيبسي

خذ البيبسي و ورقة طلاق بنتي تجيني بكره

---------------------------------------------------

هذولا اللي اقصد فيهم لما تبيعه ما يجيب لك 10 ريال

مـونيْ ★
13-03-2012, 07:36 PM
تسلمين حبيبتي على الدعووووه
موضوعك حلوو البنت أهم شي تتزوج شخص يكون يحبها ويقدرها ويحترمها قبل لا ننظر الى الماده لان السعاده ورضى الزوجين أهم شي بااستمرار الحياه الزوجيه
من ناحية المهر غلط من ينظر أنه اللي مهرها رخيص يعني اهلها يبون الفكه بالعكس هذا يرجع لتواضع اهلها وتواضعها

جبرني غلاك
13-03-2012, 11:36 PM
مساء / صباح الخير

رايي ان المهر لايودي ولا يجب

اهم شي الرجال يلقى البنت ( المتدينه , الجميله وبعد ذالك صاحبة المال )

واهم شي البنت تلقى الرجال المتدين العاقل صاحب المال وصاحب الجاه


(((( اهم شي الدين )))

الخجوله كووول
14-03-2012, 01:53 AM
بصراحه اشوف الاب لما يطلب مهر غااالي هذي بيعه وقبض الثمن يعني الي يدفع اكثر يشيل
انا ضد تحديد المهر ماتيسر مع الشاب يقدمه ومااتوقع راح يقصر
احنا شعب اتعبنا المظاهر والتقليد الاعماء
تسلم علي الطرح الاكثر من روعه
تحياااتي لسموك

وهف
24-05-2012, 12:06 PM
المهر لايعني قيمه البنت ابدا . الرجل او البنت الكل منهم يطمح لحياه هاديه كلها حب واحترام وتكوين اسره بالمستقبل والكل منهم يتعاون مع الاخر

الشمالي الشمري
26-05-2012, 03:32 PM
والله بصراحه المهر ليس له اهميه لاكن البعض يرا واعتقد ان كثرت المهر شي تعجيزي
كما يفعل بعض من المجتمعات والبعض يرا ان البنت ابوها فلان من الناس لازم المهر يكون ضخم
فالناس متفاوتين والبعض يحب التقليد بنت فلان مهرها كذا وانا بنتي وش ناقصها
والاغلبيه لتعجيز والله والله والله ان قريب لي راح يخطب وطلبو عليه 300000والله العظيم لتعجيز فقط لاغير
اما انا فاكتفي بقول خير البشريه إذا أتاكم من ترضون دينه وأمانته فزوجوه

وهف
11-06-2012, 10:18 PM
اذا اهل البنت رفعوا المهر فوق المعتاد والمتعارف لااحكم على البنت المسكينه بشئ لانها تحت حكم اهلها . لكن من يريد ان ارتبط به لابد ان نفهم بعض والمال لايكون بيننا هو الهدف .فلو تزوجتها بمهر قليل فهي ستضل اكبر بعيني ولو تزوجتها بمهر غالي سوف تبقى مثل ماهي المال لايحكم قيمه الشخص وهذه النظريه العاقل يعرفها ................ اشكرك اختي الخفوق على اهتمامك برايي لكي احترامي وتقديري اخوك وهف

حصيصه ام قصيصه
21-06-2012, 12:51 AM
انا من راي البنت الفروض اخر شي تفكر فيه المهر اهم شي الرجال يكون زين ومحترم وشكرا علئ الموضوع الاكثر من رائع :uowgirlsighxj2::s113:

وهف
03-07-2012, 02:08 AM
بحاجه لمواضيع مفيده كهذا لكي يعلم الجميع ويعرف الصحيح

RD1
10-09-2012, 12:19 AM
صح وجة النظر الاولى انه صاروا الرجال قليل اللي يقدر المراه ويحترمها بس يبونها تخدمهم وتجيب لهم اولاد وهم يطلعون يستانسون ومو حاسين بالمسؤليه
اماا سالفة رخص المهر وغلاءه هذا شي راجع لاهل البنت وهم يطلبون غاالي عشان الاسعار مرتفعه لاااكثر وفيه نااس تبيع بناتها عشان الفلوس الله يهديهم وانا معك انه البنت تبي اللي يحترمها ويقدرها لاكن قليل تلقينهم
وانا عن نفسي بواافق على الرجال اللي يقدرني ويحترمني ومااهمني المهر غالي او رخيص :)



والله يعطيك الف عاافيه موضوع راائع ومميز ويستحق النقاااش ,,,
اتمنى رايي يعجبك:SnipeR (21):

FatemaAlmansoori
02-10-2012, 12:16 PM
السلام عليكم ورحمة الله وبركاته ،،

الموضوع حلو

و اول رأي صحيح و ثاني راي بعد صحيح
الزوج اذا طلع من جيبه المبلغ بيحس بقيمة الزوجه

مثاال / اذا اخذ سيارة من جيبة ماراح يلعب فيها و راح يحاسب في كل شي

الحين نحن لين ناخذ المبلغ هذا ؟؟ الا علشان ناخذ فيه اغراض العرس
و كل هالاغراض للزوج - يعني بلبس له بتعطر له و بكشخ له
يفضل ان يكون المبلغ معقول

اما عن ان الزوجه تحتااااااج زوج يفهمها و يحن عليها و يحترمها انا معه 10000000%

الزوجه طلعت من بيت اهلها مب علشان يهينهاا
لاا هي تتوقع حياه افضل و تفاهم
و بعد فتره بيعرف الزوج ان البذرة اللي زرعها في زوجته اثمرت بخير في اولاده و في زوجته

خفايا روح
21-10-2012, 02:42 AM
مساء الخير
أولاً: التوفيق من الله هذا مافيه نقاش
و
ثانياً: برأيي أن البنت هي الأساس ... هي اللي ترسم خط سير الحياة الزوجية منذ البداية
اذا انحرف الخط ....ضاعت حياتها .....و انتهى كل شيء
و لا مهر غالي ....و لا مهر زهيد هو اللي يصنع أسس الحياة الزوجية

تشكرات الخفوق

غروب الشمس
21-10-2012, 11:13 AM
اولا موضوع حلوو
ثانيا بالنسبة المهر ان قل او كثر لا علاقة له بالسعادة واستمرارية الزواج فالتفاهم اهم ركيزة في العلاقة الزوجية
لا سيما ان توفرت الكفاءة بين الزوجين ومخافة الله

A.J.M
28-10-2012, 12:24 AM
السلام عليكم

عمر ما كانت الفولس تقيم انسان فما بلك بالمهر لو يفكر بعض الاباء شوي بس ان بنته هذي كيان بشري له احساس مشاعر مش سلعه للبيع وثاني شيء مادام رجال طق الباب وجاء هو مع اهله معناه انه شارية وقضية المهر قضية المهر وجهة نظري انا رجال اذا دفع مبلغ كبير جدا هذا بيخليه يحسس البنت طول الوقت بانه ابوه باعه له طبعا الموضوع هذا كله يرجع للرجال نفسه كيف يشوف البنت

سحر الكون
20-01-2013, 09:18 PM
يسلموووووووووووووووو

الأميرة التائها
04-03-2013, 10:57 PM
انا جداً اسفه اختي الخفوق على تاخري في الرد عليك تصدقي اني توي اشوف الموضوع والله الشاهد يشرفني انك تطلبي رأيي والله اخجلتي تواضعي والاخوان والاخوات ماقصرو كفو ووفو لكن اذا تكلمنا في الموضوع بمنطق العقل اشوف ان المهر مش مقياس لغلات البنت عند اهلها او خطيبها ابداً الرجل واشدد على كلمة رجل بكل ماتحملة الكلمة من معنى اذا تقدم لفتاه حتى ولم يدفع لها الا اليسير من المهر هذا لا يعيبها اوينقص من قيمتها لانهم اشترو رجال يعرف قيمتها برجولتة وليس بمهره وهذا يدل على غلاها ومكانتها عند اهلها لانه اختارولها رجل بمعنى الكلمة وليس صراف ولكن هناك عادات وتقاليد يتمسك بها البعض بشده من ناحية قيمة المهر ويرجع الى الطبقية في المجتمع كل طبقه لها منظور في قيمة المهر ولا يتدخل بقيمة الانسان اذا كان قليل اوكثير تقبلي ودي واحترامي واعتذر مره اخرى على التاخر في الرد اختك الاميرة التائها :bear: