المساعد الشخصي الرقمي

مشاهدة النسخة كاملة : قصة بحر العطا مع اخوه وسوق الخضره


بحر العطا
20-04-2009, 04:04 AM
السلام عليكم لكل قاريء

ودي ابدا بالقصه على طول اذا ماعندكم مانع


في يوم من الأيام جمعنا أبي حفظه الله ورعاه أنا واخواني

قال ياعيالي الدنيا مافيها خير وانا تعبت الين ربيتكم وصرتوا رجال والواحد من كثر ما غذيته

وأكلته من رز الرصيص صاير كنه جرة فول تمشي على الأرض !!!, http://www.alkhubr.net/imgcache2/25605.gif


لكن قبل اعلمكم وش قررت ودي اوريكم شي سواه احد الحكماء مع عياله

وجاب أبوي تسعة عيدان << جمع عود وهو غصن الشجره اليابس قال انتم الحين تسعه وابي كل

واحد يمسك له عود ويحاول يكسره بس قبل يكسره ابي اجمعها لكم وكل واحد يجرب يكسرها <<

الله يهديه هالشايب مايدري ان هالقصه حتى بزارين الروضه يعرفونها ,, اكبر اخواني عاقل يخزي

العين بس البلى في اللي عقبه مسمينه القطمه هو قصير بس متعافي طلع شنبه قبل تفطمة الوالده

http://www.alkhubr.net/imgcache2/25606.gif , المهم جا ابوي واعطي هالعصي لأخوي الكبير العاقل اخوي الكبير عارف السالفه وقال

سم يبه! وش تبي اسوي فيها ؟تبيني أوديها المشب وازين لك دله بالزعفران !!!!! http://www.alkhubr.net/imgcache2/25605.gif , هو يجامل

ابوي طبعاً قال ابوي لا ياولدي الله يرضى عليك ابيك تكسرها كلها اذا تقدر قال له إبنه البكر ابشر

لو تبيني اكسر البيت كله ماعندي مانع << هالمره خانته الذرابه ههههههههه

طبعاً أخذ أخوي الأعواد و قام يتعصر ويضغط على سنونه حتى تنفخت أوداجه , يعني انه يحاول

يكسر العيدان يوم شافه ابوي ماقدر يكسرها انبسط وتبسم وقال له خلاص ياولدي أعطها اخوك

الثاني (يقصد القطمه)


أخوي الثاني قال يعني يا يبه تبيني أكسرها؟!

قال ابوي بلغة الواثق إيه http://www.alkhubr.net/imgcache2/25607.gif


قال القطمه ماطلبت شي الله يحييك !! http://www.alkhubr.net/imgcache2/25608.gif

وأبد وفي ثانيه وحده إلا والحزمه كأنها هشيم تذروه الرياح http://www.alkhubr.net/imgcache2/25609.gif ههههههه


كسرها كلها(هماني اقول لكم متعافي) ابوي شافه والا ماشافه إلا ويضيق صدره قال في نفسه

ليتني داري كان دابغه وطارده من البيت قبل اسوي هالإختبار !!! http://www.alkhubr.net/imgcache2/25610.gif


المهم قام وصرف السالفه وقال انا يوم سويت الإختبار هذا ابي اشوف انشط واحد فيكم ومن

الواضح انه القطمه لذلك قررت إني ارشحه في شغله اخليه يمسكها


وكانت فكرة ابوي ان واحد من عياله يشتغل في حلقة الخضار لانه سمع ان فيها ارباح خياليه

احتج اخوي وقال يا يبه مايصير اروح لحالي لأن الشغله صعبه وفيها حوسه قال ابوي اجل اختار

واحد من اخوانك يساعدك


أخوي خابرني بحر وخبل واسمع كلامي اللي أكبر مني قال ابي بحر معي

قال ابوي تم توكلنا على الله


وانا فاتح فمي كالعاده ومدربي راسي وأوافق << كنهم طلبوا رايك أصلاً http://www.alkhubr.net/imgcache2/25611.gif

جاني اخوي وسوا معي اجتماع


قال تعرف إنت وش معنى خضره؟ قلت ياخوي أي شي أخضر اسمه خضره


قال اخوي طيب عطني مثال للتوضيح


قلت : خذ عندك مثلاً الخيار ,, الجرجير ,, النادي الأهلي !! http://www.alkhubr.net/imgcache2/25605.gif


مامداني اكمل أمثلتي إلا وهو يقول لي stop ويمسكني بإذني إلين سمعتها تطقطق ,, وقال خلاص

انا بعدين أفهمك


بس لازم نصلي الفجر هناك وبعدين بعلمك وش المطلوب منك


بدينا في أحد أيام الخميس


صحينا قبل أذان الفجر وكان وقت شتاء , إلا الوالده الله يطول بعمرها مسويه لنا حنيني وحاطته في

حافظه قالت هذا فطور لكم وابوي معطي أخوي خمسية ريال كبدايه في عالم المال والبزنس


على فكره اخوي القطمه عنده خلفيه عن هالشغله ماخذها من واحد من الجنسيه اليمنيه كان شغال

بحلقة الخضره قبل يغير نشاطه ويشتغل بسوق الذهب !!


اخذنا سيارة اخوي الكبير وكانت مازدا لونها بيج (شاهي على حليب) مسمينها البقره لأنها

ماعمرها خربت على ان دخانها إذا شافوها الناس تمشي يحسبونها سيارة البلديه حقت رش

المبيدات الحشريه !!!!!


المهم وفي وسط هالبرد مشينا مع مذن الفجر الأول

وما أمدى البنغاليه اللي في حلقة الخضره يقيمون الصلاه الا وحنا معهم


(السالفه هذي قبل السعوده) ,, كان المكان كله بلاط مسويته البلديه مسكنا كذا كرتون وحطيناه

على الأرض عشان نصلي عليه


أول ماسلم الإمام إلا والعالم تنتشر قال اخوي خلنا نشوف وش يسوون ونسوي مثلهم ,, راحوا

لمكان الحراج وكان فيه شيخ المحرجين (سعودي) إلا وهالدينات ( جمع دينا أو دنه) مليانه بجميع

أنواع الخضار


طماط جاي من وادي الدواسر وبطاطس جاي من حايل وتريلات الشربتلي حقت الموز شوي إلا

ويبدا المزاد وبحكم إن الطماط هو ارخص الخضار هذيك الايام قال اخوي خلنا نروح نزاود

ونشتري الحمله كلها


ويبدون على طول ل 1000 ريال الفين وهالبنغاليه يزيدون على طول تعدت القيمه راس مالنا


المهم ويرسي العطاء على ذاك البنغالي ويشتري الحمله كلها , ! طيب وش الدبره الحين؟! اثر

البنغالي اشتراها وهو عارف زباينه ,, جوه باقي البنغله واشتروا منه برضه بالجمله وجملته

هالمره بالكراتين اقل شي عشرين كرتون ونطب معهم نبي نشتري إلا والبنغالي ابن الكلب

يسفهنا !! واخوي تقفل معه قال يابن الكلب والله لو ماتبيعنا لالعن خيرك http://www.alkhubr.net/imgcache2/25612.gif ,, ماتعرفني ترى! قال

له البنغالي الكرتون ب 50 ريال والحيوان يبيعه على باقي البنغاليه ب18 ريال !! انا انتبهت

لهالشغله وعلمت اخوي وتقفل مع اخوي http://www.alkhubr.net/imgcache2/25612.gif شوي إلا وكراتين الطماط فوق البنغالي

ههههههههههه اخوي عصب وقلب عاليها سافلها وتصير ذيك الحوسه بالحلقه , إلا ويجونك

البنغاليه الباقين ويمسكوني أنا واخوي وهاتك ياطق بينا وبينهم بس الكثره تغلب الشجاعه طقونا

طق الله لايوريكم صار لونا أحمر ماندري هو من الدم والا من عصير الطماط اللي تفقع على

روسنا !! http://www.alkhubr.net/imgcache2/25605.gif ,,, شوي الا ويجون موظفين من البلديه ويفرقون بينا ومعهم بعض السعوديين وشيخ

حراج الخضره ويستفسرون عن سبب الهوشه


ويجي اخوي قال هالبنغالي يبيع البنغاليه بسعر رخيص وحنا بسعر غالي وبعد مجادلات وأخذ

وعطى اشترينا منه الصندوق ب20 ريال اخذنا 20 صندوق طبعاً الصناديق كبار يعني كل صندوق

تقدر توزعه على عشر كراتين صغيره ويطلع متوسط سعر التكلفه في كل كرتون صغير بريالين


ماصدقنا بصراحه


معقوله !!!!

الكرتون اللي يشتريه ابوي دايم ب10 ريال سعره في الاساس ريالين بس اجل لو شرينا من راعي

الدينا على طول كم بيطلع سعره؟!! << طمع الأخ من أول يوم http://www.alkhubr.net/imgcache2/25605.gif


المهم اشترينا هالكراتين ورحت انا واشتريت 100 كرتون فاضيه حجمها صغير الكرتون بريال

عشان نوزع الطماط فيها واسوي فيها ذرب واجيب لي سطل مويه واجلس انا واخوي ننظف في

الطماط من التراب حق المزرعه ونقوم بتنقية الطماط الخربان نقشعه والزين نحطه بالكرتون

صفينا ً 100 كرتون صغير والزايد لقينا لنا طراره (شحاذه لونها اسود لماع) واعطيناه اياه مع

الطماط الخربان ,, فسقه من أول يوم هههههه


(بالمناسبه البنغاليه يبيعون على هالطرارت لكن بسعر رخيص جداً)


يعني مايضيعون ريال


الحين نجي في اصعب شغله

تصدقون كل اللي راح كوم والجاي كوم ثاني


حنا نحسب ان الزباين بيجون يشترون منا على طول واتفقت انا واخوي ان سعر الكرتون ب10

ريال يعني بتصير القيمه الف ريال للبضاعه كلها ونكون ربحانين دبل في يوم واحد !!!!


اثاري الشغله ماهيب خذني جيتك


خلصنا من التنقيه والحوسه أول ماطلعت الشمس ونجلس على رصيف الحراج الين الساعه ثمان

نبي العالم تشتري منا ماحد اعطانا وجه


اثره مايجي هنا الا تجار الجمله بس يعني المواطنين العاديين مايجون !!


وش هالنكبه !ماحد شرى كرتون واحد


شوي الا والبلديه جايتنا قالوا يالله شيلوا كراتينكم واطلعوا من المكان , لأنهم يقفلون المكان على

الساعه 8 الصباح عشان ينفظونه من بقايا الخضره


ياهوه وين نروح طيب http://www.alkhubr.net/imgcache2/25610.gif

قالوا دبروا عماركم يعني اول مره تجون الحلقه؟, قلنا ايه


قالوا ماشاء الله جايين على طول تبون تربحون وانتم منتم فاهمين شي


المفروض تجلسون على الاقل اسبوع وانتم تتفرجون وبعد ماتعرفون الوضع تبدون تشتغلون!!!

لاحووووووووول طيب وش الدبره الحين http://www.alkhubr.net/imgcache2/25613.gif


توهقنا بكراتين الطماط حتى المازدا مانقدر نحطها فيها

اثر البنغاليه التسلاب يراقبونا من بعيد


ويجينا واحد منهم قال ايس فيه؟!

ونتبسم له بكل براءه (نسينا الهوشه والطق اللي مع الفجر) ههههههه http://www.alkhubr.net/imgcache2/25605.gif

نبيه يشتري الطماط ونفتك ,, ويتبسم هو بكل خبث http://www.alkhubr.net/imgcache2/25608.gif


قال على طول وبدون مقدمات انا يستري تمات زمله (يتشري الطماط جمله) ب200 ريال

إلا وتقفل مع اخوي يلعن شكلك يبن ؟؟؟؟؟؟ http://www.alkhubr.net/imgcache2/25612.gif نعبنوك راس مالنا خمسميه وتبي تخسرنا 300

ريال انقلع لابارك الله فيك والله لو افقع هالطماط كله على راسك ماتاخذه واسوي نفسي متنرفز مع

اخوي قلت الخلا يابوفسيه هههههههه ( من الصباح وانا ادور لهم عياره وذب وماحصلت الا

هذي !! http://www.alkhubr.net/imgcache2/25605.gif


زود الحيوان في السعر وخلاه 420 ريال قلنا يفتح الله


في الاخير راح وجلس قبالتنا (اللوح داري ان ماحد شاري منا وقال بيرجعون علي ويوافقون)

المهم صقعتنا الشمس وشوي الا وتجي الساعه 11 الظهر وحنا ماحد شرى منا شي


ويطري على اخوي طاري غريب شوي


قال ياخي بروح لشيخ الحراج يمكنه يجيب لنا زبون والا شي وانت خلك هنا عند كراتين الطماط ,,

شوي الا وهو جاي ومعه واحد من أهل المدينه المنوره ووراه الطماط حقنا ووافق هالسعودي

ياخذه مننا ب700 ريال على انه حسب كلامه ماشتراه مننا إلا عقب واسطة شيخ الحراج والا

ماليه نيه يشتري اليوم


يوووووووووووووووووووووه هو وافق والا ماوافق

حسيت بوناسه وفرحة ولا فرحة لاعب حواري توه موقع عقد مع فريق كوره كبير بمليون

ريال !!!! !!


اخوي قال اسمع يابحر حكاية ان ابوي ياخذ ال700 حلال زلال هذي ينقزها الشايب الله يسلمه

هههههههههههه http://www.alkhubr.net/imgcache2/25605.gif

لكن تبي العلم انا باخذ 150 ريال وانت بعطيك 50 ريال تشحن جوالك دام فيه عرض عند الاتصالات http://www.alkhubr.net/imgcache2/25614.gif

انا كالعاده وافقت وماعندي أي مشكله عادي حتى لو اخذ الميتين كلها اهم شي اني اسمع كلام

اخوي الكبير http://www.alkhubr.net/imgcache2/25605.gif

رجعنا للبيت واخوي صك الشايب صاروخ أرض جو وقال له لقينا الحلقه مقفله اليوم معطلين

خميس وجمعه ويفتحون يوم السبت !!!


أبوي درى ان اخوي نصاب وقال اقول هات الخمسميه ويوم اعطاه اياها صك اخوي بالزبيريه

اليسار وانا ولله الحمد مامداني انحاش ولصق زبيريته اليمين في جبهتي هههههههههههههه http://www.alkhubr.net/imgcache2/25605.gif


وهذي أول حكايه لي في البزنس !!http://www.alkhubr.net/imgcache2/25615.gif


وهالحين لازم اعطيكم الفوايد من هالقصه


1-حكاية ان الشاب السعودي بياكل عيش مع الاجانب من أول تجربه هذي بتبطون عظم فيها http://www.alkhubr.net/imgcache2/25605.gif

2_قبل تدخل في أي شغله حتى لو شفت انها بسيطه لازم إنك تدرسها من جميع النواحي وتشوف

جدواها الإقتصاديه ومدى حماسك وإمكانياتك للقيام بها


3_ في العاده ينجح الشاب السعودي اللي داخل بحماس وقوه ويكون تفكيره منصب في كيف يطور

قدرته على المنافسه ومايكون همه متى يمديه يجيب ثمن سياره كامري يسوي بها هجوله ويفحط

بها في الشوارع http://www.alkhubr.net/imgcache2/25605.gif


4_ القطاع الخاص افضل مليون مره من القطاع الحكومي وكلمة السر فيه هي الصبر ثم الصبر

ثم الصبر حتى لو فشلت في المره الأولى فاعرف انك استفدت من هذه التجربه الفاشله


5_موضوعي هذا مافيه لا عياره ولا سوالف تخليك تنسدح جمب الكيبورد من الضحك لكن قلت

اغير واجيب موضوع مفيد http://www.alkhubr.net/imgcache2/25605.gif

6_إذا رأيت الأجنبي يتبسم فاعرف انه يرسم عليك وعلى فلوسك ولاتحسبه يتبسم لأنه معجب في

سواد عيونك << تذكر ابتسامة البنغالي حق الخضره http://www.alkhubr.net/imgcache2/25611.gif

7_ اذا ماقدرت تفتح مشروع لحالك شوف لك واحد يشاركك بس شوف

(مو تجيب لك شريك لعبت معه مره بلوت في استراحه وفزتوا واستانست وقلت له وشرايك

نتشارك في مشروع تجاري) http://www.alkhubr.net/imgcache2/25605.gif ههههههههههه

لابد ان يكون الشريك له مزايا معينه وتتفق مع هذا الشريك على كل شي قبل تبدون لأن أكثر

مايخرب الشراكه بين السعوديين هو أن لكل واحد فيهم هدف يختلف عن الآخر


وسلاااااااااااااااااااااااامتكم

الحنووونه
20-04-2009, 04:32 AM
وه اخيرا وصلت للنهايه عيوني زقللت هههههههههههه <<< مناك بس

ههههههههههههههههههههه الله يرج ابليسك بجرب حركة العيدان مع اخواني << بالله

وايش هي الحنيني
هههههههههههههههههههههههه احس معهم ماتدري وين الله حاطك خخخخخخ

ههههههههههههههههههههههههههههههههههههههههههههههههه وربي حلوة القصه
يسلمووووووووووو
ولا ننحرم من جديدك

بحر العطا
20-04-2009, 05:41 AM
وه اخيرا وصلت للنهايه عيوني زقللت هههههههههههه <<< مناك بس

ههههههههههههههههههههه الله يرج ابليسك بجرب حركة العيدان مع اخواني << بالله

وايش هي الحنيني
هههههههههههههههههههههههه احس معهم ماتدري وين الله حاطك خخخخخخ

ههههههههههههههههههههههههههههههههههههههههههههههههه وربي حلوة القصه
يسلمووووووووووو
ولا ننحرم من جديدك

ههههههههههههههههههههههههه

انا اشوف انها قصيره انا عندي اكثر من ذالك بس ماحب أظايق الاعضاء بها ماودي اثقل عليهم

هههههههههههههههههههههههههههههههههه

الله يسلمك عندي بس اذكروا الله ياجماعه إلا بذكر الله تطمئن القلوب لا اله الا الله

يعطيك العافيه الحنونه

سـكرر وكـل من شآفني يسكر
20-04-2009, 05:54 AM
ههههههههههههههههههههههههههههههههه يعلم آلله آني آنسدحت من جنب الكيبورد على قولتك من جد ضحكت ضحك الله لايوريك !
وسعت صدري بسرآحه آلله يوسع صدرك يآآرب بس ترا آخووك فلللله خلك مثله:a050v:
ربي مايحرمنا جديدك تقبل مروري سكر

بحر العطا
20-04-2009, 06:13 AM
ههههههههههههههههههههههههههههههههه يعلم آلله آني آنسدحت من جنب الكيبورد على قولتك من جد ضحكت ضحك الله لايوريك !
وسعت صدري بسرآحه آلله يوسع صدرك يآآرب بس ترا آخووك فلللله خلك مثله:a050v:
ربي مايحرمنا جديدك تقبل مروري سكر



الله يجعل أيامك كلها الضحك ونااااااااااااااااااااسه

هههههههههههههههههههههههههههههههههههه

فديتك والله

الله يسمع منك واصير مثله بس ههههههههه


آمين يعطيك العافيه سكر وتوه نورت الصفحه

poor_man996
20-04-2009, 06:19 AM
حبيب قلبي موضوووعك طوويل
لكن
يسلموووووووووو

بحر العطا
20-04-2009, 06:40 AM
يسلمو مرورك بورمان انا ترى مختصره كثير لأني أدري الناس هنا مايحبون يتعبون أنفسهم بالقرأه

~~نادية~~
20-04-2009, 06:47 AM
دخلت على طووول يوم شفت العنوان .. اشتقنا لقلمك و سوالفك الحلوه
هههههههههههههههه
قصه حلوه ماشاء الله عليك يا بحوور لكن ممكن نعرف من وين يجيك الإلهام هع
يسلموووو ننتظر جديدك بفارغ الصبر

بحر العطا
20-04-2009, 06:53 AM
دخلت على طووول يوم شفت العنوان .. اشتقنا لقلمك و سوالفك الحلوه
هههههههههههههههه
قصه حلوه ماشاء الله عليك يا بحوور لكن ممكن نعرف من وين يجيك الإلهام هع
يسلموووو ننتظر جديدك بفارغ الصبر

ههههههههههههههههههههههههههه

سلمتي من شــــــر يارب


يمكن ساكنه معي جنيه

هههههههههههههههههههههههههههههه

لابسم الله عليه

والله من ربك ياناديه


ابشروا بكل خير بس ياناديه في الناس مايبحون يقرون مواضيع طويله وانا هالموضوع اختصرته كثير والله ....لاهنتي على مرورك العطر

متسبب
20-04-2009, 02:27 PM
قريـــت نصها وبكرة بكملها << والله طوووووووووويلة

بس حلوة وشكرا يالغالي

شكرا
20-04-2009, 03:02 PM
حلووووووووووه القصه يابحر

بس اقول يازين الوظيفه اخر الشهر والراتب مصفط في الرصيد


لاتعب ولابهذله

والقناعه هي كنز لايفنى

ثانكس

بحر العطا
20-04-2009, 08:16 PM
قريـــت نصها وبكرة بكملها << والله طوووووووووويلة

بس حلوة وشكرا يالغالي



خذ راحتك أدري أنه ثقل عليكم لا وبد هذا وانا مختصره بعد

بحر العطا
20-04-2009, 08:17 PM
حلووووووووووه القصه يابحر

بس اقول يازين الوظيفه اخر الشهر والراتب مصفط في الرصيد


لاتعب ولابهذله

والقناعه هي كنز لايفنى

ثانكس


نعم القناعه كنز لايفنى


يسلمو مرورك الجميل

الحس المرهف
20-04-2009, 11:32 PM
قصتك حلوه وتموت من الضحك
بس في أمور ماحبيتها في بعض جوانب من القصه
وانت أكيد راح تفهم وش قصدي
وعلى فكره يابحر أصابع ايدك مو وحده

بحر العطا
20-04-2009, 11:40 PM
قصتك حلوه وتموت من الضحك
بس في أمور ماحبيتها في بعض جوانب من القصه
وانت أكيد راح تفهم وش قصدي
وعلى فكره يابحر أصابع ايدك مو وحده


يسلموووووو مرورك واحترم وجهت نظرك

ساره العبدالله
21-04-2009, 01:06 AM
ههههههههههههههههههههههههههه يسلمووو بحر العطا ع القصه الرائعه وانا جذبني العنوان


وانت مبدع دايم انا احب اتابع مواضيعك الرائعه والله انبسط على قصتكم الله يوفقك يارب

شماليه والدلع نجداوي
21-04-2009, 01:09 AM
ههههههههههههههههههههههه
حلووووه قصتك الا ابدااع من جد وربي ميته ضحك على كلامك ووصفك للمواقف

يسلمووووو ماقصرت خيو

بحر العطا
21-04-2009, 02:37 AM
ههههههههههههههههههههههههههه يسلمووو بحر العطا ع القصه الرائعه وانا جذبني العنوان


وانت مبدع دايم انا احب اتابع مواضيعك الرائعه والله انبسط على قصتكم الله يوفقك يارب


هههههههههههههههه

ويوفقك يارب وتوها نورت الصفحه ياساره والإبداع كله مروركم فديتكم كلكم

بحر العطا
21-04-2009, 02:41 AM
ههههههههههههههههههههههه
حلووووه قصتك الا ابدااع من جد وربي ميته ضحك على كلامك ووصفك للمواقف

يسلمووووو ماقصرت خيو


هههههههههههههههههههههههههههه

الله حيــــــــــها هلاوغلا بشماليه

عساك دايم التضحكين ومستانسه

واتمنى ان ماتبخلين علينا مواضيعك الرااائعه