المساعد الشخصي الرقمي

مشاهدة النسخة كاملة : رزان ( قلب الحب والحنان)


بحر العطا
08-04-2009, 05:06 AM
بسم الله الرحمن الرحيم
السلام عليكم ورحمة الله وبركاتههذه قصه من نسج الخيال تحكي عن بعض البنات وانا حبيت اسميها البنت هنا رزان

أنا اسمي رزان الامورة ويدلعوني زيزي اللزيزة حابة احكي لكم قصة صارت لي ..فأنا كنت في حالي لبالي لالي ولاعلي ..فانا لما نجحت من ثالث متوسط وانتقلت الى الثانوي حسيت اني كبرت وتغيرت فيسولجيات جسمي وتفكيري ..وصار عندي شعور ورغبة اني وبأي طريقة كانت الفت انتباه وانظار من حولي بس ياخسارة ماحولي أحد .. دايم اسمع صقيقاتي في المدرسة يحكون عن بطولاتهم وهجولاتهم وانهم بالمرة فالينها فكل وحدة تتباها ان لها حبيب تتكلم معاه ويسمعها كلام حلو ..وبعضهم يتكلمون عن طلعات ومطاعم وتمشية ..اما غيركذا فالكذب خيبة والله ماني حاطة في ذمتي شي ..هذا اللي كنت اسمعه منهم الا اذا كان فيه اشياء ثانية ما ادري عنها فالله واعلم

صرت حاسة ان عندي فراغ عاطفي فأنا غيرانة من صقيقاتي وطاقتني الشفقة ولا ادري وش ازين ..ودي اسوي سواتهم بس مدري وش اللي مانعني .. مدري هل هو خوف أو ان تربيتي ماتسمح لي .. ولكن الارجح انه مابعد فتح لي المجال ولا اعرف وش الطريقة اللي تخليني اصير مثلهم .
الين جا ذاك اليوم كنت متكية في الفسحة تحت السدرة وماكان معاي من صحباتي الا رغد ..فتجرأت وسألتها :رغودة حبيبتي وش لون الوحدة يصير عندها خوي ؟؟ ضحكت رغودة ياحليلك يارزان !! تسألين عن شي ماهنا اسهل منه ..انتي ماتدرين انتس في ديرة استهلاكية تضف اللي قدامها ولا تناظر لا تاريخ إنتهاء ولا هل المواد الللي فيه مسرطنه والا لا.. رزان اغلب اللي حولك يبون أي شي يضفونه يدوون ولو ريحة بنت..عاد زينة شية بيضا عبدة .. هما بس اللي قدامه يقال عنها مره فماعنده مشكلة يلهث وراها .. تصدقين عاد يارزان اني اعرف وحدة بالمرة حلوة ومن جمالها تقول للقمر افتز يا القمر باقعد مكانك ومع ذلك زوجها يراكض ورا وحدة تقصرين وانتي تقولين شينة ولولا اسمها ولبسها كان ماقلتي ان هذي بنت بنت طيب رغودة ماتخافين من هاللي تتعرفين عليه ؟؟ ليش هو بياكلني!!لا اقصد يعني ماتخافين يسوي لك مشاكل عند اهلك ؟؟ ردت علي وهي توخر قصيصتها من على عيونها رزان هاللي تقولين ماتوا وحنا هالحين في عصر السرعة والتكنلوجيا والعالم هالحين كله كالقرية الواحدة <----- ماهيب عاقلة رغد اذا تحمست

وفيما كانت رغد تهم لمغادرة المكان سألتها طيب اخر سؤال وش احسن شي للتعرف على الشباب ؟؟ ردت علي بعد مالقتني قفاها : كلش السوق الشات المنتديات السكايب عدي واغلطي غادرت رغد المكان وأما انا فذهبت في هوجاس عميق لم افق منه الا على اثر مااصاب رأسي من مخلفات (التسحالي) اللي كان على غصن السدرة .

عدت الى منزلي (شاعطة) الدرج متوجهة الى غرفتي بلهفة غير ابهة الى توجيهات والدتي انتبهي وانا امتس لاتمسطين على خشتس ثم معد نلقى احدن ياخذتس دخلت غرفتي وقبل ما افسخ مريولي نغزت كمبيوتري وقبل مايشتغل دخلت على قوقل طالبة منه أن يدخلني على اقرب دردشة ..وكان لي ما أردت حيث وجدت نفسي في( دردشة التماسيح لقنص من بها ريح ) دخلت الغرفة العامة وما أن قلت السلام عليكم واذ بشاشتي اصبحت صفراء اللون وكل يطلبني برايفت ..لم احتر كثيرا في الاختيار حيث قلت حقرا بقرا وعليه تم الاختيار بدأ محادثته معي بممكن اتعرف؟؟ ممكنين ممكن ونصف لعنبو خيرك وش جابني في هالشات الا علشان اتعرف

اول محادثه كانت مابين وش اسمك ؟؟ ومن وين ؟؟والعمر كله ..حيث قال لي ان اسمه وليد وعمره 23 سنة.. سبحان الله من يوم كتب لي ممكن اتعرف الا وقلبي دلى يفرفش تسنه عصيفير توه يتعلم الطيران حسيت ان وليد هذيا دخل قلبي مع اوسع بيبانه ..ماطولنا في المحادثة او بالأحرى ماحسيت بالوقت اللي قضيته معه والوكاد اني واعدته ادخل نفس الشات وبنفس الوقت

صار كل يوم يزيد حبي لوليد ..ياربيه اسلوبه في الكتابة بالمره حلو ...طلب رقم موبايلي معللا بأن النت يحوم التسبد فما أن يخش جو المسكين الا والنت فاصل ثم بسم الله عليه يضيق صديره ..ولكني ابيت كما تأبى البنت العفيفة الابية وقلت اذا تبيني اضيفك في المسن فما يخالف اما غيره فيفتح الله
أضفته طبعا بعد ماعملت لي اميل خاص بذلك فحنا يا البنات شغلنا منظم مهوب مثلكم يا العيال نخلط درداس مع مرداس ..الوحدة منا لها شلقة اميلات فكل قروب له اميل خاص ..فبنات الخالات مضافات عندي في اميل .. وبنات الفصل في اميل ..وبنات المنتدى في اميل اخر وهلم جرا .

صرت اكلمه مسن ولكنه يقول لي ماش قلبي ينغزني ياخوفتي يارزان تطلعين شنب ثم اكل خابور بس امانه اذا انتي ولد فلاتعلميني خليني كذ الين اموت وان كانتس بنت فتكفين ودي اسمع صوتس كي يطمأن قلبي وترتاح فرائصي قلت مسيكين خل اريحه واكلمه مايك ياربي كنت بالمرة مستحية كان هو يتكلم وانا يادوب تطلع مني الكلمة ما ان سمع صوتي الاوذاب في مكانه وقعد ساعة يجمع روحه .. صار يطلب مايك واذا رفضت قال لاتتكلمين يكفيني اسمع نفسك او ضحكاتك الحلوة فصار هو يتكلم وانا اكتب له كتابه مع اطلاق ضحكاتي الغير ارادية على سواليفه وبينما حنا على هالحالة طلب مني اغني له يا الله ما ادري ليه صرت ما اقدر ارفض له اي طلب حتى لو رفضت في البداية فهو من باب اغصبني واتغيصب فغنيت له سواها قلبي يحبيبي وحبك فقال الله !! صوتك روعه !! تصدقين ان صوتك مقارب لصوت فييروزايه اصلا واحدن من جداني كان عليه دم وانحاش للبنان حتى ان فيروزز فيها بوهة من عمي عزيّز رزان بطلب منك طلب ؟؟ سم امر واجيك اطامر ودي اشوف صورتك لاعاد كلش الا هذي عديها الشوفه الشرعية يوم سمعت هالكلمة تسنه راش علي اميهه باردة وارسلته صورة افقال: ماش تسن الملامح مهيب واضحة فارسلت له ثانية فاعجبته صورتي ايما اعجاب ولكنه شكك بان تسريحتي لها دخل فأرسلت له اخرى بتسريحة اخرى الين مصخها فما كان مني الى ان ارسل له صورتي وانا توي قايمة من النوم وعيوني مجحمه ولكنه هذه المره شكك بان الصور ليست لي وانما صورة وحد ة ثانية فماكان مني الى اني افتح كامي واوريه صورتي على الهواء مباشرة ومن بعدها صرنا مانتكلم الا على الكام فما اكلمه الا وانا منجعصة على سريري ذو المفرش الستن سبع قطع مموج بموف شاريته من سوق الاندلس بذيك العدة ماطاع راعي المحل ينزل لي فيه ولا ريال بس على قولة خالتي حصة وبناتها مهيب خسارة فيه الفلوس اللي اندفعت فيه .

باربيه مدري وليد ذيا ساحرني والا انا اللي صدق حبيته صرت معد اسقم عنه ودي اسمع حسه في كل دقيقه صرت اهذري به وحول ما انادي اخواني باسمه خذت رقمة وصرت اصحيه للدوام واذا طلع دقيت عليه :تكفى ياوليد لاتسرع ..وانتبه للطريق ..وهاه افطرت عمري والا لا؟؟ امانه وليد لاتخلي الفطور بس مو عاد تكثر ثم تصير لك كرشة صرت كل اشوي ادق عليه :وليد اشتقت لصوتك ..وليد تحبني ؟؟ اياني اقلقت مندوبه http://www.alkhubr.net/imgcache2/23970.gif

سويت هذا كله عشان وليد كان واعدني بالزواج .. يا الله متى اكون انا وليد تحت سقف واحد ؟؟مو متخيلة انه بيكون عندي اولاد.. يعني انا باكون ائووليد ابو عيالي .. كنت اقوله هاه وليد :امانه بكرة مو تخلي تدريس الاولاد علي وانت تسرح على خشبتك لا انا علي تدريس البنات وانت تتكفل بتدريس الاولاد كنت اشكي له همومي ومشاكلي مع اهلي واعلمه بكل شي يصير.. في المدرسة وش قالت رغودة ووش ردت شدو عليها.. ووش كانت لابسة بنت عمتي وو ش كان لون جزمة بنت خالتي ..كنت كل ما رن جرس بيتنا قلت بس اكيد هذا وليد جايب ابوه يخطبني .. كنت كل ماقلت وليد متى حبيبي تتقدم لاهلي رسمي ؟؟ قال قريب .. قريب .. انتي على ويش مستعجلة ؟؟الين جا ذاك اليوم اللي قال لي فيه الا يارزان ليش ما تطلعين معي!! لا كلش الا هذي انتي تشكين فيني اشك في الناس كلهم اشك في امي وابوي الا انت مستحيل اشك فيك..انت روحي وعمري ودقات قلبي خلاص اطلعي معي عشان تختارين عفش البيت فاقنعني كلامه وعشاني مانيب من البنات اللي تروح السوق لوحدها ولانيب من اللي يخلونها اهلها تروح للصديقاتها ولانيب من اللي يخلونها اهلها في البيت لوحدها فما لي الا اني افاخت من المدرسة ..وهذا اللي حصل فعندما حطني السواق عند عاير المدرسة الا وانا في سيارة وليد .. تمشينا بسيارته ونزلنا السوق واتفقنا على اغلب عفش البيت ماعدى غرفة النوم كان فيه شبه التفاق فهو كان يبيها في مقدمة البيت وانا كنت ابيها في مؤخرة البيت بعدين عزمني على الفطور في حدى المطاعم الراقية بس يوم جا الطب تفاجأت انه ماطلب الا اثنين عصير بس .. مرت هالطلعة على خير فمحد جاب خبرها .. بعد يومين من طلعتي معاه طلبني اطلع معه مرة ثانية ..فقت لا خلاص والله ما اقدر والحمدلله ان محد من اهلي درى وامانه ياوليد اذا تحبني فلاتقل لي طلعة وماطلعة وانت عارف معزتك عندي فما دريت الا وهو يقول استلمي هالملف وبعدين قفل المحادثة لما شفت وش هو مرسل لي ؟؟..يا الله !! مو قادرة استوعب!! مو معقوله هاللي اشوفه !! يعني انا كنت كل هالفترة مخدوعة!! لعنبو جدفة كان مسجل كل شي صار بيني وبينه.. صوري وصوتي يوم اغني له واللي قاطع قلبي حتى مفرشي الموف النذل رازة في الملف وكاتب في الاخير .. هاه وش قلتي ؟؟

اتصلت عليه وانا ابكي لا لا ياوليد اكيد انت تمزح انت بس بتشوف ردة فعلي انت واعدني الخميس هذا تخطبني قل ايه تكفى انت عارف اني رفضت ولد عمي عشانك انتي مصدقة؟؟!! اجل انا مهبول آخذ وحدة سوت معي هالاشياء ؟؟!! وش يظمن لي ماتسويها مع احد غيري مثل ماسوتها معي؟؟ انا الى مني بغيت اتزوج دورت وحدة نظيفة ..المهم وسعي صدرتس معي ولبي لي طلباتي ونسيت اقول لتس تراي محتاج خمسة الاف ريال والا ترى هالملف بياصل جوال ابوتس وكل اقرباتس حينها جا في بالي كلام رغد يوم تقول ان شبابنا يدورون ولو اسم بنت ..عرفت ان كلامها فيه تكملة فكلامها هذا كان في مجال التسلية واللعب اما اذا جا العرس فالوضع عندهم يختلف تماما

صرت مثل المجنونة مدري وش اسوي !! صرت اتخيل ابوي وامي واخواني واقرباي انهم دروا عن اللي سويته .. يا الله وش بتكون ردة الفعل؟؟!! ساعتها تمنيت اني اموت ولا اشوف هالموقف ..ياربي اول مرة في حياتي اتمنى اني اكون ولد ..فلوي كنت ولد فالوضع بيختلف تماما ففعلتي هذي بتكون شبه عادية حتى لو كنت مسوية اعظم وادهى.. بيقولون شاب مراهق عادي يسوي هالشي لكن عشاني بنت فالوضع عند مجتمعي غير ومحد بينسى اللي سويته لو صار ماصار فلا انا ولا اهلي ولا جماعتي بنسلم من استنقاص الناس وهمزهم ولمزهم

بعد ماكشف لي وليد وجهه الحقيقي تبدل شعوري تجاهه وصرت اكره كره الويل ليته ذبحني ولو بسكين خضرة ولا وكلني هالمنكح لانه لو كان قتلني حقيقة كان صار ذبحني مرة وحدة لكنه بهالطريقة صار يذبحني كل ساعة وكل دقيقة تمر من حياتي ..ياربيه وش اسوي الفلوس منوين اجيبها؟؟ والطلعة معه مستحيله.. مهنا الا اني انحاش من البيت او اني انتحر فصرت افكر في طريقة اموّت نفسي بشرط ان محد يدري اني منتحرة وبينما انا على هالحالة الاوتجي في بالي دعاية حليب السعودية وقلت بس مالي الا حليب السعودية فينك ياحليب السعودية؟؟ اتصلت عليهم السلام وعليكم السلام ابد مافيه الا سلامتك يا الغالي انا بنت مسكينة لالي ولا علي ضحك علي الشيطان ومشيت بدرب بطال تعرفت على واحد وصار بينا مايغضب الله سبحانه وانا هالحين ندمانه وعرفت ان الله حق والمشكلة ان الرجال اللي مشيت معه واقف حجر عثر في طريق هدايتي وانا بنت لي سمعتي عند اهلي وجماعتي وعلمته القصة من طقطق الى سلام عليكم ولما خلصت من كلامي سمعني كلام عن التوبة وكم حديث عن اللي يخطي ويستغفر وكلام كبير ماعرف اقوله ووعدني ان الموضوع بيتم في سرية تامه ورسم لي خطة من خلالها يتم التخلص من سي وليد هذا .. وفعلا بديت بتطبيقها حيث اتصلت على وليد وقلت له انا فكرت في اللي قلته وفعلا كلامك في محله ووش لنا غير سعة الصدر والوناسة وانا من يدك الى رجلك انت فصل وانا البس بس اهم شي اللي بيننا تكفى لايدري عنه احد ..انبسط واستانس وقال اجل الليلة اللي تبي ماعندي مشكلة راس مالها اقول لاهلي ابزور صديقتي بس على شرط ياوليد نروح للمطعم نبي عشى يلبد البطن مهوب تسكتنا بعصير وان كانك مستكثره علي فانا اللي ابحاسب والوعد في مطعمنا ماغيره الساعة تسع .. ويوم صارت الساعة ثمان ونص دقيت عليه هاه وليد وينك؟؟انا قاعدة في المطعم انتظرك حبيبي لاتطول فانا مره مشتاقه لك كلها نصف ساعة وجاي حبيبتي وفعلا ماطول كثير دق علي هاه رزان وينك انا في كبنية 11 تعال بسرعة وترى بطاريتي بتنتهي ثم قفلت جوالي عشان ابين له ان البطاريه انتهت وفعلا دخل المطعم وجا لم الكبينة اللي وصفتها له ولقى الستارة مسكرة وصار ينادي باسمي بس ماحد رد عليه .. فدخل الكبينة وهو يقول اجل مستحية يارزااااا ماكملها لانه تفاجأ باثنين حونشية كانوا باستقباله .. لقطوه يد ورجل ونطلوه في الجمس وخذوا جواله منه ولقوا فيه البلا والجلا .. لقوا فيه مقاطع وصور لرزان ومية بنت على شاكلة رزان ورسايل تهديد لبنات ثانيات مثل الرسالة اللي ارسلها لي فكسروا الممري بعد اعترافه واحيل للجهات المختصة لاجراء اللازم بعد ماسجلوا عليه اعترافه وارسلوه للجهات المختصة http://www.alkhubr.net/imgcache2/23971.gif .


أخوكم
بحر العطا

سـكرر وكـل من شآفني يسكر
08-04-2009, 03:52 PM
صرررررررت آحب آقرآ قصصك يآدوب مآنتحرمش منك آستمررررر

بحر العطا
08-04-2009, 09:43 PM
صرررررررت آحب آقرآ قصصك يآدوب مآنتحرمش منك آستمررررر




يسلمووووووووووووووووو مرورك العطــــــــــــــــــر